erdoghan türk döletliri teshkilatigha eza döletlerning rehberliri bilen körüshti

türkiye awazi radiyosi xewiri: türkiye jumhur reisi rejep tayyip erdoghan türk döletliri teshkilatining nöwetchi reisi bolush süpitide, qazaqistan weziyiti toghrisida teshkilatqa eza döletlerning rehberliri bilen téléfonda ayrim-ayrim körüshti.

jumhur reislik uchur-alaqe idarisining bayanatida bildürülishiche, rejep tayyip erdoghan qazaqistan pirézidénti jömert toqayéw, ezerbeyjan pirézidénti ilham eliyéw, qirghizistan pirézidénti sadir japparow we özbékstan pirézidénti shewket mirzayéw bilen téléfonda körüshüp, qazaqistanning nöwettiki weziyiti üstide özara pikir almashturghan.

rejep tayyip erdoghan qazaqistan pirézidénti toqayéw bilen körüshkende, dost we qérindash dölet qazaqistanda yüz bergen weqelerni yéqindin közitiwatqanliqlirini eskertip, weqelerde jénidin ayrilghanlargha allahtin rehmet, yarilanghanlargha shipaliq tilidi.

u türkiyening qazaqistan bilen hemkarliq ichide ikenlikini eskertip, türk döletliri teshkilatiningmu élan qilghan bayanatida qazaqistanni qollaydighanliqini tekitligenlikini qeyt qildi.

u qazaqistanda yéngi hökümetning baldurraq qurulushini we yirikchiliklerning qisqa waqit ichide axirlishishini ümid qilidighanliqini bildürüp, qazaqistan xelqining özara ishench we diyalog ramkisida mesililerni hel qilalaydighanliqigha ishinidighanliqini éytti.

u zörür tépilghanda, türkiyening her türlük téxnikiliq melumat we tejribilirini ortaqlishishqa teyyar ikenlikini sözlirige ilawe qildi.

u ezerbeyjan pirézidénti ilham eliyéw, qirghizistan pirézidénti sadir japparow we özbékstan pirézidénti shewket mirzayéw bilen körüshkendimu qazaqistanning muqimliqi we bixeterlikining qoshna döletler üchünla emes, belki pütkül rayon üchünmu intayin muhim ikenlikini tekitlep, qérindash dölet qazaqistanning diyalog arqiliq bu mesilini hel qilalaydighanliqigha ishinidighanliqini qeyt qildi.