jumhur reis erdoghan küntertiptiki mesililer toghrisida toxtaldi

türkiye awazi radiyosi xewiri: erdoghan tünügün kechte bir qisim xususiy téléwiziye qanallirining birleshme neq meydan söhbet pirogrammisigha qatniship, küntertiptiki mesililer toghrisidiki qarashlirini ortaqlashti.

jumhur reis rejep tayyip erdoghan iqtisadiy we pul - muamile muqimliqigha kapaletlik qilish, ijtimaiy parawanliqni ashurush we ammiwi mulazimetni ünümlük qilish hökümitining mejburiyiti ikenlikini tekitlidi.

sözide türkiye ning kowid - 19 yuqumigha qarshi téz sürette waksina tereqqiy qilduralighan 9 döletning biri ikenlikini, turkowakning yuqum mezgilide élip bérilghan xizmetlerni yüksek pelligen kötürülgen bir tereqqiyat bolghanliqini bildürgen erdoghan: «türkiye bolush süpitimiz bilen, 50 yildin kéyin, pütünley yerlik we milliy imkaniyetlirimizge tayinip tereqqiy qildurulghan waksinimizning her bir basquchida özimizning alimliri we tetqiqatchilirimiz orun aldi. ishlitilish ijazetnamisining élinishi bilen birlikte, sinowak we biontéktin kéyin yerlik waksinimiz turkowaknimu xelqimizning xizmitige sunimiz, hetta insaniyetning xizmitige sunimiz, ularningmu shipaliq tépishi üchün paydilinimiz. shuning bilen birlikte, biz dunyaning eng chong waksina tetqiqat qilish, tereqqiy qildurush we ishlepchiqirish merkizi bolidighan <hifzussihhe> türini enqerede royapqa chiqirimiz. (buning üchün) pat arida xéridar chaqirimiz» dédi.

jumhur reis erdoghan, türkiyening 8- süniy hemrahi «Türksat 5B» alem boshluqigha ewetilgendin kéyin, tésla we SpaceX ning qurghuchisi élon mask bilen ötküzgen téléfon söhbitide yéngi türlerning küntertipke kelgen yaki kelmigenliki toghrisidiki soalgha jawab bérip, süniy hemrah we alem téxnikisining konkrét we layaqetlik tejribe we ul eslihe telep qilidighan téxnika ikenlikini éytti.

%100 yerlik sistéma qurulushi we yerlik imkaniyetlerge tayinip ishlepchiqiriliwatqan Türksat 6A süniy hemrahiningmu 2023- yili SpaceX shirkitige tewe Falcon 9 rakétasi bilen alem boshluqigha ewetilidighanliqini bildürgen erdoghan: «yéqinqi yillardin buyan qolgha keltürgen bösüshlirimiz, yétishtürgen layaqetlik adem küchi bayliqimiz we qurghan ul eslihelirimiz sayisida alem boshluqidiki mewjudiyitimiz küchiyidu. biz hetta bu jehette éksport qilidighan haletkimu kélimiz» dédi.

erdoghan «afriqa bilen bolghan munasiwette türkiyeni qandaq bir kélechek kütüwatidu?» dégen soalgha: «türkiye bolush süpitimiz bilen, afriqadiki barliq döletlerge dégüdek elchixana échish arqiliq afriqaning hemmila yéride mewjut bolushni xalaymiz. yer asti – yer üsti barliq bayliqliri mesilisidimu yene afriqa bilen teng nep élish pirinsipi boyiche méngishni xalaymiz. türkiye <silermu payda élinglar, bizmu payda alayli, birlikte payda alayli> dewatimiz, toghrisi afriqa döletlirimu bu jehette bizge ishinidu. <birlikte qilayli> dewatidu. hazir bu nuqtigha kelduq» dep jawab berdi.