chawushoghlu türkiyening tashqi siyasette diplomatiyeni asasiy orungha qoyidighanliqini éytti

türkiye awazi radiyosi xewiri: chawushoghlu xelqara munasiwet kéngishi jemiyiti teripidin intérnét muhitida uyushturulghan xelqara bixeterlik akadémiyesining yépilish yighinigha qatniship söz qildi؛ rusiye bilen ukraina, rusiye bilen shimaliy atlantik okyan ehdi teshkilati – nato otturisidiki riqabetning xeterlik derijige bérip qalghanliqini tilgha alghan chawushoghlu: «biz peqet rusiye bilen keng dairilik munasiwitimiz bolghanliqi üchünla pirinsiplirimizgha we ukraina bilen bolghan qoyuq munasiwitimizge sel qarimaymiz. buninggha oxshash nurghun qiyin ehwallarda, sharait we dölet bixeterlikimiz némini telep qilsa, shuni qilimiz. bu qiyin ish, emma diplomatiyening ishi mushu» dédi.

chawushoghlu tashqi siyasetni milliy qimmet – qarashlar, pakitlar, mumkinchilik we iqtidarlar asasida élip bériwatqanliqlirini tekitlep, türkiyening diplomatiyeni pirinsipqa dexli - teruz qilmastin, réal usul bilen élip baridighanliqini eskertti.

dölet bixeterlikining eng muhim kapalitining birining türkiyening yaltaytish küchi ikenlikini otturigha qoyghan chawushoghlu, yaltaytish qudritige ige bolush üchün herbiy küch, nopus we iqtisadiy küch qatarliq amillardin bashqa, ünümlük diplomatiyegimu éhityaj barliqini éytti.

türkiyening keng jughrapiyelik makanda diplomatik teshebbus ewzellikini asas qilghan réal tashqi siyaset yürgüzüwatqanliqini tekitligen chawushoghlu: «bizde paaliyetlerning  bizge hökümranliq qilishigha yol qoymastin, inkas xaraktérlik emes, aktip diplomatiye yürgüzüsh chüshenchisi bar» dégenlerni qeyt qildi.

chawushoghlu özlirining diplomatiyeni hemishe aldinqi orungha qoyup kelgenliklirini we buningdin kéyinmu shundaq qilidighanliqlirini eskertip, liwiye, sherqiy aqdéngiz we süriyegiche bolghan barliq jaylarda «aldi bilen diplomatiye» dep kelgenliklirini tekitlidi.

chawushoghlu: «biz diplomatiye tosqunluqqa uchrighan ehwallardimu meydangha chüshtuq, bu qetiylik rayonimizdila emes, dunyaning her qaysi jaylirida bizning milliy küch chüshenchimiz we yaltaytish qudritimizni ashurdi» dégenlerni sözlirige ilawe qildi.