шәнтоп пүткүл дунйа әллирини көчмәнләр мәсилисидә һәмкарлиқ орнитишқа чақирди

түркийә авази радийоси хәвири: шәнтоп,  полша зийарити тоғрулуқ мухбирларниң соаллириға җаваб бәргәндә, зийаритиниң мувәппәқийәтлик  өткәнликини, түркийә – полша оттурисидики мунасивәтләрниң наһайити йахши сәвийәдә икәнликини, йәниму йүксәк сәвийәгә йәткүзүш йолида техиму көп ғәйрәт көрситидиғанлиқлирини қәйт қилди.

у, полша – беларусийә чегра линийәсидә йүз бәргән көчмәнләр киризисигә мунасивәтлик соалға җаваб бәргәндә, көчмәнләр киризисиниң пүткүл дунйаниң муһим мәсилиси икәнликини тәкитләп мундақ деди: «түркийә уда 10 йилдин буйан 5 милйон әтрапида көчмәнгә саһибханилиқ қилмақта, түркийә дунйа бойичә тәртипсиз көчмәнләр мәсилисидә әң зор қийинчилиққа дуч кәлгән дөләттур, әмма биз бу мәсилини, пәқәт мәлум дөләтләргила, пәқәт көчмәнләрниң өтүш еғизидики дөләтләргила, пәқәт көчмәнлик мәнбәси болуп қалған қошна дөләтләргила әмәс, пүткүл дунйаға мунасивәтлик йәр шариви бир мәсилә, дәп қараймиз.»

пүткүл хәлқара җәмийәтниң бу һәқтә мәсулийәтни өз үстигә елиши лазимлиқини әскәрткән шәнтоп, мундақ дәп көрсәтти: «йавропа иттипақи дөләтлирини өз ичигә алған пүткүл дунйа әллири бир йәргә җәм болуп, көчмәнлик мәсилисидә йол хәритиси сизип чиқиши лазим, һәмдә буниң мәсулийитиниң мәлум дөләтләрниңла зиммисигә йүклинип қелишиға йол қоймаслиқи керәк, дәрвәқә, буниң мәсулийити пүткүл дунйаға аиттур, һәтта бәзи дөләтләрниң бу һәқтә техиму чоң мәсулийити бардур؛ чүнки ашу дөләтләрни йашиғили болмайдиған әһвалға чүшүрүп қойған амил, бир қисим чоң дөләтләрниң сийасәтлиридур, шу вәҗидин, уларниң өзлири сәвәбчи болған мәсилиниң мәсулийитини өз үстигә елиш мәҗбурийити бар, болмиса, кәлгүси бир нәччә йил ичидә, пүткүл дунйани аваричиликкә салидиған техиму еғир мәсилиләргә дуч келишимиз мумкин.»