erdoghan: <<yéterlik, ozuqluq qimmiti yuqiri we bixeter yémeklikke érishish hemme kishining hoquqi>>

türkiye jumhur reisi rejep tayyip erdoghan yéterlik, ozuqluq qimmiti yuqiri we bixeter yémeklikke érishishning hemme kishi üchün asasiy heq-hoquq ikenlikini éytti.

1725692
erdoghan: <<yéterlik, ozuqluq qimmiti yuqiri we bixeter yémeklikke érishish hemme kishining hoquqi>>

türkiye awazi radiyosi xewiri: jumhur reis rejep tayyip erdoghan islam hemkarliq teshkilati 8-qétimliq yémek-ichmek bixeterliki we yéza igiliki tereqqiyatigha mesul ministirlar konféransigha widéo ewetti.

rejep tayyip erdoghan widéoda, dunya nopusining köpiyishige egiship, yémek-ichmek telipiningmu kündin-künge éshiwatqanliqini eskertip, tebiiy apetler, su qisliqi, ot apetliri, sel, qurghaqchiliq qatarliq kilimat özgirishining selbiy tesirlirining yémek-ichmek menbelirini buzghunchiliqqa uchratqanliqini qeyt qildi.

u wuxen wirusi (Kovid-19) ning yéza igilikidiki éhtiyaj-telep tengpungluqini buzup tashlighanliqini, teminlesh zenjirliride üzülüshke sewep bolghanliqini  we dunya nopusining texminen %10 ning acharchiliqqa duch kelgenlikini bayan qildi.

u dunyaning bir teripide 810 milyon kishi eng asasiy yémek-ichmek maddilirigha érishelmigen bir waqitta, yene bir terepte chong sermaye xojayinlirining bir qanche minutluq alem sayahiti üchün yüz milyonlarche dollar xejlewatqanliqini alahide tekitlidi. u mundaq dédi:

<<uchur-alaqe téz tereqqiy qilghan, dunya bir yézigha aylanghan mushundaq waqitta, héchkim bashqilardin méning néme karim déyelmeydu. yéterlik, ozuqluq qimmiti yuqiri we bixeter yémeklikke érishish alahide imtiyaz emes, belki hemme kishi üchün asasiy heq-hoquq hésablinidu. islam hemkarliq teshkilatining ezasi bolush süpitimiz bilen, téximu adil dunya üchün awazimizni yuqiri kötürüsh, insaniyet üchün zörür mesuliyitimizdur. elwette, buning üchün aldi bilen otturimizdiki hemkarliq we ittipaqliqni kücheytishimiz muhim ehmiyetke ige.>>

u axirida, keng kölemde tériqchiliq qilghili bolidighan yerliri, kilimat we jughrapiyelik alahidiliki sayisida yéza igiliki mehsulatlirida dunyada aldinqi orunda turidighan türkiyening tejribe-sawaqliridin paydilinishni ümid qilidighanliqlirini sözlirige ilawe qildi.



مۇناسىۋەتلىك خەۋەرلەر