fahrettin altun türk kéngishi médiya munbiride söz qildi
türk kéngishining «uzungha sozulghan ötmüsh, küchlük kelgüsi» témiliq axbarat munbiri yighini türkiye jumhuriyiti jumhur reislik mehkimisi uchur – alaqe ishliri idarisi sahibxanliqida bashlandi.
türkiye awazi radiyosi xewiri: jumhur reislik mehkimisi uchur – alaqe ishliri idarisi diréktori fahrettin altun munberning échilishidiki sözide, türkiye jumhuriyitining dölet ichi - sirtida «heqiqet kürishi» qiliwatqanliqini otturigha qoyup: «biz yalghangha we xata uchurlarni yéyishqa qarshi heqiqet terepte turushni exlaqimizning telipi we shoari dep qaraymiz» dédi.
bu xil exlaqiy meydanning «heqiqettin halqighan bir ish» dep qariliwatqan hazirqidek chaghda téximu muhim orungha ötkenlikini tekitligen altun , sözini dawamlashturup: «biz heqiqetni menisizleshtürüshke, ehmiyetsizleshtürüshke, jemiyetlerni medeniy, iqtisadiy we idiyewi jehettin mustemlike qilishqa uyghun haletke keltürüshke urunuwatqan toluq menidiki yalghan sanaitige duch kelmektimiz. bu yalghan sanaiti dunyaning her qaysi jaylirida <yalghan xewerler> yaki <toqulma mezmun>lardin paydilinip jemiyetlerni biz we ulardin ibaret ikki xil qutupqa ayrishqa, mehkum qilishqa tirishmaqta. ochuq qilip éytqanda, biz yalghanchiliq kespige, xata uchurgha qarshi küreshni dölet bixeterlikimizning ayrilmas bir qismi dep qaraymiz we barliq qedemlirini mushu nuqtini chiqish qilghan halda tashlimaqtimiz.
yene bir tereptin, xata uchurning yalghuz ijtimaiy taratqudila emes, eneniwi taratqulardimu barliqini körüwatimiz. ularningmu pat - patla jemiyetning réflikissini sinaydighan we kashila liniyesini qozghitishni meqset qilidighan neshr buyumlirini élan qiliwatidu. bu yerde men bir qisim chet el döletliri meblegh salghan organlarni we ularning dölitimizdiki kéngeymilirini közde tutuwatimen. biz bu zamaniwi troyalargha qarshi hoshyarliqni östürüp, ularning ziyanliq paaliyetlirini birlikte toxtitishimiz kérek» dégenlerni qeyt qildi.
u yene, «bügün türk kéngishi bolush süpitimiz bilen bizning wezipimiz reqemlik fashizm, tor jahangirliki we yershari yalghanchiliq kespige qarshi ortaq uchur ishlepchiqirish we tarqitish yollirimizni kücheytish bolushi kérek. bu dairide, rehberlirimizning türk dunyasining kelgüsi üchün qiliwatqan parallél halda uchur – alaqe sahesidimu toghra heriket qilidighan ijtimaiy ang berpa qilishimiz lazim» dédi.
bu arqa körünüshte, altun türkiye taratqulirining barliq küchlük organliri we teshkilatlirining, bolupmu türkiye radiyo -téléwiziye bash idarisi — TRT we anadolu agéntliqining özara hemkarliq ornitish, tejribe almashturush we ortaq türlerni ishqa ashurush ishikining ochuq ikenlikini otturigha qoyghan altun: «uchur – alaqe idarimizning bayriqi astida paaliyet élip bériwatqan biz — men we sepdashlirim— pütün küchimiz bilen jumhur reisimiz rejep tayyip erdoghanning rehberlikide büyük we küchlük türkiye ghayisini ishqa ashurush, türk dunyasining birliki, ittipaqliqi we bayashatliqini qolgha keltürüsh üchün, héchqandaq tehditke pisent qilmastin, herqandaq heywige boyun egmestin.dawamliq küresh qilimiz» dégenlerni tekitlidi.
fahrettin altun, türk dunyasining yer shari alaqe sahesidiki iqtidari we qabiliyitini ashurush we uchur bulghinishigha qarshi turush üchün her jehettin töhpe qoshushqa teyyar ikenliklirini sözlirige ilawe qildi.
