«istanbul pul – muamile merkizini xelqaraliq merkezge aylandurushni nishan qiliwatimiz»
jumhur reis rejep tayyip erdoghan istanbul pul – muamile merkizini dunyadiki muhim merkezlerdin birige aylandurushni nishan qiliwatqanliqlirini éytti.
türkiye awazi radiyosi xewiri: jumhur reis erdoghan, «rayonluq pul – muamile konféransi» gha yollighan sinliq uchurida, yéqinqi 2 yildin buyan, saghlamliq bilen birlikte iqtisadiy teripimu bar bolghan yer shari xaraktérlik kiriziske qarshi küresh qiliniwatqanliqini, 2020-yili dunya iqtisadida% 3.5 töwenlesh, yershari sodisida% 10 ke yéqin tariyish körülgenlikini, yémek - ichmek we tawar bahasining dunya miqyasida yéqinqi 10 yilliq rékortning buzup tashlanghanliqini eskertish bilen bir waqitta, türkiyening bu basquchta hem yuqumgha qarshi küresh, hem iqtisad saheside bashqiche tedbir qollanghanliqini tekitlep mundaq dédi: «yuqum eng küchlük hés qilinghan mezgillerdimu, ishlepchiqirish, eshya oboroti, ishqa orunlashturush we sanaet sahesini taqash yolini tallimiduq. / ...2020 - yili % 1.8 lik nisbet bilen, 20 dölet guruhi ichide eng zor tereqqiyatni qolgha keltürüsh bilen bir waqitta, sanaet ishlepchiqirish miqdarini eng köp ashurghan döletler qataridin orun alduq, 2021-yilining birinchi charikide % 7.2 lik, ikkinchi charikide bolsa % 21.7 lik éshish süritini qolgha keltürüp, yolimizni dawamlashturduq, shuning bilen bir waqitta, éksport sahesidimu rékort yaritip, yilliq nisbette 212 milyard dollar kirim kirgüzdüq, yuqum mezgilide yer shari xaraktérlik sélinmilar % 35 töwenlep ketken bir peytte, élimizde asasen héch astilimidi, xudayim buyrisa, 2021-yilini % 9 lik tereqqiyat bilen tamamlashni nishan qiliwatimiz.»
bu muweppeqiyetler bilen parallél halda xelqaraliq meblegh salghuchilarning türkiyege bolghan qiziqishining ashqanliqini eskertken jumhur reis erdoghan, mundaq dep körsetti: «iistanbul pul – muamile merkizini dunyadiki muhim merkezlerdin birige aylandurushni nishan qiliwatimiz, bu layihening islamiy pul-muamile jehettinmu merkezge aylinishini ümid qilimiz, bu heqtiki qanun chiqirish xizmetlirimizni pat yéqinda tamamlaymiz.»
türkiyening, meblegh sélish we soda pursiti jehette xelqaraliq meblegh salghuchilar üchün intayin jelp qilarliq qanungha ige dölet ikenlikini bayan qilghan erdoghan, meblegh salghuchilarni türkiyege teklip qildi.
