әрдоған: изилгүчиләр намидин елип бериватқан  күрәшни йүксәк сәвийәгә йәткүзүш ирадимиз қәтий

җумһур рәис рәҗәп таййип әрдоған барлиқ езилгүчиләр вә зийанкәшликкә учриғучилар намидин елип бериватқан күрәшни йәниму йүксәк сәвийәгә йәткүзүш ирадилириниң қәтийликини билдүрди.

1721855
әрдоған: изилгүчиләр намидин елип бериватқан  күрәшни йүксәк сәвийәгә йәткүзүш ирадимиз қәтий

түркийә авази радийоси хәвири: җумһур рәис әрдоған, «2021 – йиллиқ < TRT World > мунбири» йиғиниға йоллиған синлиқ телеграммисида, инсанийәтниң йеқиндин буйан иқтисадий, иҗтимаий, сийасий вә инсаний тәрәплирини өз ичигә алған наһайити кәң даирилик сағламлиқ кризисигә қарши күрәш қиливатқанлиқини әскәртиш билән бир вақитта, бу җәрйанда оттуриға чиққан өзгиришләрниң, буниңдин кейин дунйада һечқандақ бир ишниң илгирикигә охшаш болмайдиғанлиқини испатлап бәргәнликини,  пүткүл инсанийәтниң келәчикигә тәһдит селиватқан бу кризис алдида, дунйаниң тинчлиқи вә адалитигә капаләтлик қилишқа мәсул органларниң йәнә бир қетим синақтин өтәлмигәнликини тәкитләп мундақ деди: «тәрәққий қилалмиған дөләтләр вә намрат җәмийәтләр өз тәқдиригә ташлап қойулди, содида қоруқчилиқ күчийип, тәминләш зәнҗирлири бузулди, иқтисадий қийинчилиқлар билән бирликтә, ғәрб дөләтлиридә өчмәнлик җинайәтлири қорқунчлуқ дәриҗигә берип йәтти, йавропалиқ сийасийонлар, җәмийәтләрни худди рак һүҗәйрисигә охшаш қоршап туруватқан ислам дүшмәнликигә қарши  күрәш қилишниң орниға, буни суйиистемал қилиш, униңдин пайдилиниш, уни сийасий пайдиға айландуруш вә сайламларда авазға еришиш йолини таллимақта.»

дунйадики мәвҗут түзүмниң узундин буйан адаләт вә муқимлиқ бәрпа қилалмиғанлиқини әскәрткән җумһур рәис әрдоған, мундақ дәп көрсәтти: «ислам дунйасида сөз һәққи болмиған, африқа, латин америка вә җәнубий асийаниң тәләплири нәзәргә елинмайдиған, пәқәт күчни қолға киргүзүвалған бәш дөләтниң мәнпәәтила нәзәргә елинидиған бу түзүмниң һазирқи қурулмиси бойичә давамлишалиши әсла мумкин әмәс, бирләшкән дөләтләр тәшкилати вә башқа хәлқаралиқ органларниң ислаһат еһтийаҗиға әмди сәл қарашқа болмайду.»

түркийә болуш сүпити билән бу ислаһат  еһтийаҗини көп йиллардин буйан «дунйа бәштинму чоң» тәриқисидә оттуриға қойуп келиватқанлиқлирини қәйт қилған җумһур рәис әрдоған, мундақ деди: «барлиқ езилгүчиләр вә зийанкәшликкә учриғучилар намидин елип бериватқан күрәшни йәниму йүксәк сәвийәгә йәткүзүш ирадимиз қәтийдур.»

у йәнә, инсанларни мәркәз қилидиған, адаләт вә һәққанийәтни алдинқи пиланға қойидиған, күчлүкләр һәққанийәтчи дәп қарилидиған әмәс, һәққанийәтчиләр күчлүк болған йәр шари тәртипи қурулғанға қәдәр изчил күрәш қилидиғанлиқлириниму  сөзлиригә илавә қилди.



مۇناسىۋەتلىك خەۋەرلەر