erdoghan: xelqara jemiyetning afghanistan xelqini öz teqdirige tashlap qoyushtek bir tallishi yoq

jumhur reis rejep tayyip erdoghan, xelqara jemiyetning afghanistan xelqidin yüz örüp, uni öz teqdirige tashlap qoyushtek bir tallishining yoqluqini otturigha qoydi.

1718572
erdoghan: xelqara jemiyetning afghanistan xelqini öz teqdirige tashlap qoyushtek bir tallishi yoq

türkiye awazi radiyosi xewiri: jumhur reis erdoghan,  20 dölet guruhining afghanistan témiliq pewquladde rehberler yighinigha istanbuldiki wahdettin sariyidin sin körünüshlük ishitrak qildi.

afghanistanning yéngi siyasiy we jughrapiyelik siyasiy réalliqqa duch kéliwatqanliqini, döletning muqimliqini tézdin kapaletlendürüshning rayon üchünla emes, xelqara üchünmu muhim ehmiyetke ige ikenlikini bayan qilip: «talibanni sighdurushchan hökümet qurushqa yéteklishimiz kérek» dédi.

«xelqara jemiyetning afghanistan xelqidin yüz örüp, uni öz teqdirige tashlap qoyushtek bir tallishi yoq» dégen erdoghan, barghanséri éghirlishiwatqan insanperwerlik kirizisi tüpeyli afghanistan xelqi bilen küchlük ittipaqdashliq ornitish lazimliqini tekitlidi.

erdoghan, türkiye qizil ay jemiyitining yéqinda afghanistanni 33 tonna yémeklik yardimi bilen teminligenlikige isharet qilip: «biz bu qiyin künlerde afghanistan xelqige bolghan qérindashliq mejburiyitimizni dawamliq ada qilimiz» dédi.

afghanistandiki özgirishlerning köchmenlik xewipini ashuruwetkenlikini tilgha alghan erdoghan: «türkiye afghanistan menbelik yéngi köchmenler yükini kötürüp kételmeydu. men 20 dölet guruhi ichide xizmet guruppisi qurushni tewsiye qilimen. türkiye bolush süpitimiz bilen biz bu guruppining bashliqliqinimu telep qilimiz» dégenlerni qeyt qildi.

erdoghan türkiye duch kélidighan köchmenler bésimining tesirige yawropa  döletlirining muqerrer uchraydighanliqini sözlirige ilawe qildi.

 



مۇناسىۋەتلىك خەۋەرلەر