«kéler yili milliy éléktirik parawuz ishlepchiqirishni bashlaymiz»

türkiye awazi radiyosi xewiri: jumhur reis erdoghan, istanbul  atatürk ayrodurumida chaqirilghan «12 – nöwetlik 12-qatnash we alaqe kéngishi» yighinida  qilghan sözide, türkiye bolush süpiti bilen,  yéqinqi 19 yilda qatnash we xewerlishish sahesige 1 tirilyon lira meblegh salghanliqlirini, tömür yoli sélinmilirighimu ehmiyet bérip kéliwatqanliqlirini tekitlep mundaq dédi: «12 ming 803 kilométirliq tömür yol liniyesini bashtin - axir toluq yéngiliduq, mewjut liniyelerdiki signal bérish xizmitide körünerlik muweppeqiyetlerni qolgha keltürduq, memlikitimizde tunji qétim yuqiri süretlik poyiz liniyesini ishqa kirishtürduq, uzunluqi 3500 kilométir kélidighan yéngi tömür yol liniyemizning qurulushi dawamlashmaqta. buningdin bashqa yene, kéler yili milliy éléktirik parawuz ishlepchiqirishni bashlaymiz, métro, poyiz we tramwaylarnimu özimiz ishlepchiqaralaydighan sewiyige yétiwatimiz.»

dölet miqyasidiki ayrodurumlarning sanini 26 din 56 ge yetküzgenliklirini  eskertken jumhur reis erdoghan, mundaq dep körsetti: «uda 3 yildin buyan mulazimet qiliwatqan istanbul ayrodurumimiz, dunyadiki eng munewwer ayrodurumlar arisida ikkinchi, yawropadiki eng awat ayrodurumlar tizimlikide birinchi orunda turidu.»

döletning tashqi sodisidiki déngiz tiransportining ülüshini 4 hesse ashurghanliqlirini qeyt qilghan jumhur reis erdoghan, dölet bolush süpiti bilen, kémisazliq sanaiti, seyle kémisi yasash we xewerlishish sahesige meblegh sélishta nahayiti zor ilgirileshlerni hasil qilghanliqlirini tekitlep mundaq dédi: «intérnét saheside her sahe organlirimiz we xelqimizge mulazimet ölchimini yuqiri sewiyege yetküzüwatimiz, 5G ni öz ichige alghan kélechekning téxnologiyeliride milliylik we yerliklik nisbitini ashurushqa tirishiwatimiz, waqittin yéqilghugha qeder hemme jehettin bizni üstünlükke ige qilidighan téjeshlik eqliy iqtidarliq qatnash sistémisini yolgha qoyush iradimiz qetiydur.»