erdoghan partiyesining guruppa yighinida söz qildi

türkiye awazi radiyosi xewiri: jumhur reis rejep tayyip erdoghan yéngi asasiy qanun xizmetliri toghrisida toxtilip: «bashqa partiyelerning asasiy qanun teklipliri bilen özimizning teyyarliqlirini maslashturalisaq, qanun chiqirish yili axirlashmay turup, parlaméntta bu ishni tamamliyalaymiz» dédi.

jumhur reis, qoshumche adalet we tereqqiyat partiyesi reisi erdoghan partiyesining türkiye büyük millet mejlisi (parlaménti)diki guruppa yighinida söz qildi.

u, partiyesining yéngi qanun chiqirish yilidiki tunji qétimliq parlamént guruppa yighinidiki sözide yéngi asasiy qanun xizmetliri toghrisida toxtaldi.

partiyesining yéngi asasiy qanun tüzüsh teklipining semimiy bir teklip ikenlikini tekitligen erdoghan, parlaménttiki bashqa partiyelerningmu (asasiy qanungha munasiwetlik) xizmetlirini eng qisqa waqit ichide jamaetchilik bilen ortaqlishishini ümid qildighanliqini otturigha qoyup: «eger bashqa partiyelerning asasiy qanun teklipliri bilen özimizning teyyarliqlirini maslashturalisaq, qanun chiqirish yili axirlashmay turup, parlaméntta bu ishni tamamliyalaymiz» dédi.

türkiyening jumhur reislik hökümet sistémisi sayisida qolgha keltürgen üstünlükining qanchilik hel qilghuch ehmiyetke ige ikenlikini kowéd-19 mezgilide hemme birlikte körüp yetkenlikini tekitligen erdoghan: «tereqqiy qilghan döletlerni öz ichige alghan nurghun dölet hélihem nurghun siyasiy, iqtisadiy, ijtimaiy tolghaqlarning derdini tartmaqta, biz bolsaq sehiyedin sanaetkiche bolghan barliq sahelerde özimizni ijabiy yönilish boyiche ayrip chiqishqa muweppeq bolduq» dégenlerni qeyt qildi.