«türkiye – rusiye munasiwetlirini tereqqiy qildurush her ikki terepke nahayiti paydiliq»
jumhur reis rejep tayyip erdoghan türkiye – rusiye munasiwetlirini tereqqiy qildurushning her ikki terepke nahayiti paydiliq ikenlikini éytti.
türkiye awazi radiyosi xewiri: jumhur reis rejep tayyip erdoghan bilen rusiye pirézidénti wiladimir putin, rusiyening sochi shehiridiki dölet sariyida bir yerge jem boldi.
axbarat wasitilirigha yépiq halette ishqa ashurulghan uchrishish, 2 saet 45 minut dawamlashti.
jumhur reis rejep tayyip erdoghan, uchrishish harpisida bergen bayanatida, türkiye – rusiye munasiwetlirining oxshimighan shekilde tereqqiy qiliwatqanliqini, ikki dölet otturisidiki soda omumiy sommisining nöwette nahayiti yüksek sewiyede ikenlikini tekitlep mundaq dédi: «ikki dölet otturisidiki soda omumiy sommisining yenimu yüksek sewiyege yétidighanliqigha ishinimen, bolupmu sayahet saheside qollighanliqi üchün pirézidént putingha rehmet éytimen.»
rusiye bilen hemkarliq asasida qurulushi dawamlishiwatqan «mersin aqquyu yadro éléktir istansisi» toghriliqmu toxtalghan jumhur reis erdoghan, mundaq dep körsetti: «kéler yili qurulushning birinchi séxini ishqa kirishtürüshimiz mumkin.»
dölet mudapiesi sanaiti saheside türkiye bilen rusiye birlikte tashlawatqan qedemler toghriliqmu toxtalghan jumhur reis erdoghan, mundaq dédi: «türkiye – rusiye munasiwetlirini künséri yenimu yüksek sewiyede tereqqiy qilghan halda dawamlashturushimiz her ikki terepke intayin paydiliqtur, süriye mesiliside birlikte tashlawatqan qedemlirimiz nahayiti zor ehmiyetke ige, süriyede tinchliq ornitishmu yene türkiye – rusiye munasiwetlirige baghliqtur.»
rusiye pirézidénti wiladimir putin, mundaq dédi: «jumhur reis erdoghan bilen bolghan uchrishishlirimiz hemishe ongushluq bolmaydu, lékin munasiwetlik organ hem orunlirimiz birdeklik hasil qilalaydu, türkiyening rusiyege salghan mebleghliri 1.5 milyard dollargha, rusiyening türkiyege salghan mebleghliri bolsa 6.5 milyard dollargha yétidu, chong tiptiki layihelerning hemmisi pilanliq shekilde dawamlashmaqta. shuni alahide tekitlep ötimenki, qarabagh mesiliside hemkarliqimiz hem urush toxtitishni ishqa ashurush, hemde kelgüside uzaq mezgillik tinchliq ornitish jehettin nahayiti muhimdur, türkiye bilen bolghan hemkarliqimiz, xelqara sahede muweppeqiyetlik halda dawamlashmaqta, bu yerde hem süriye hemde liwiye mesililirige qarita pozitsiyelirimizni közde tutuwatimen.»
