«бизниң вәзипимиз әвладлиримизға техиму адил бир дунйа мирас қалдуруштур»

түркийә авази радийоси хәвири: җумһур рәис әрдоған, бирләшкән дөләтләр тәшкилати йемәк - ичмәк системиси башлиқлар йиғиниға йоллиған синлиқ учурида, сиҗил тәрәққийат пирограммиси даирисидә, ачарчилиқни  2030-йилғичә түгитиш нишаниниң бәхткә қарши реаллиқтин толиму  йирақ икәнликини оттуриға қойди.

дунйа нопусиниң көпийишигә әгишип, дунйаниң ашлиқ еһтийаҗиниңму муқәррәр һалда көпәйгәнликини тәкитлигән әрдоған, барғансери зорийиватқан вәйран қилиш характерлик килимат апәтлири, су кәмчиллики вә қурғақчилиқ қатарлиқ килимат өзгиришиниң нәтиҗилириниңму йемәк - ичмәк мәнбәлиригә сәлбий  тәсир көрситиватқанлиқини қәйт қилди.

йемәк - ичмәк системисиниң тәннәрхиниң ешишиға әгишип, йемәк - ичмәк мәнбәлиригә еришишниң қийинлишиватқанлиқини, йемәк – ичмәк  бихәтәрликигә зийан салғанларниң, әмдиликтә инсанларни кәң көләмлик көчүшкә тәшвиқ қиливатқанлиқини әскәрткән әрдоған, түркийәниң, «ковид – 19» йуқуми оттуриға чиқишниң алдида, зөрүр хизмәтләрни 2019-йилидин бурун башлиғанлиқини тәкитләп мундақ деди: «дөләтлик йол хәритимиз, озуқлуқ қиммити йуқири, йетәрлик вә бихәтәр йемәкликләрдин һәмминиң мувапиқ баһада еришишидин тартип, йемәк - ичмәк зийини вә исрапчилиқни азайтишқичә,  йеза игилик, чарвичилиқ вә су мәһсулатлирида изчиллиққа капаләтлик қилиштин тартип, җиддий әһваллар вә кризисқа қарши йемәк - ичмәк бихәтәрликигә капаләтлик қилишқичә болған нурғун мәсилиләргә мәркәзләшмәктә.»

йетәрлик озуқлуқ вә бихәтәр йемәк - ичмәккә еришишниң бир имтийаз әмәс, бәлки һәммә адәм үчүн бир һәқ - һоқуқ мәсилиси икәнликини қәйт қилған әрдоған, мундақ дәп көрсәтти: «әвладлиримизға техиму адил, бихәтәр йашийалайдиған бир дунйа мирас қалдуруш һәммимизниң муқәддәс вәзиписидур, түркийә болуш сүпитимиз билән, бу һәқтә изчил хизмәт ишләватимиз.»