jumhur reis erdoghan musulmanlargha chaqiriq élan qildi

türkiye awazi radiyosi xewiri: jumhur reis erdoghan, istanbulda chaqirilghan «islam hemkarliq teshkilati 4 - nöwetlik yashlar munbiri omumiy kéngishi» yighinigha yollighan sinliq bayanatida, dunyaning küntertipini dawamliq meshghul qilip kéliwatqan bixeterlik mesililiri, térrorluq paaliyetliri we «kowid – 19» yuqumi késelliklirining, hemme arzu qiliwatqan hem töt köz bilen kütüwatqan huzur muhitining toluq berpa qilinishigha tosalghu boluwatqanliqini, pütkül insaniyetke tehdit séliwatqan bu mesililerning, tolimu epsuski, eng köp islam dunyasigha chongqur  derd – elemlik izlarni qalduruwatqanliqini tekitlep mundaq dédi: « musulmanlar, bir tereptin, süriyedin tartip afghanistangha qeder keng jughrapiyede, toqunushlar, köchmenlik, yoqsulluq we késellik qatarliq qiyin ötkellerge duch kelse, yene bir tereptin, bolupmu gherb elliride barghanséri ewj élip kétiwatqan islam düshmenliki we iriqchiliqqa qarshi küresh qilishqa mejbur bolmaqta.»

bir terepte acharchiliq, urush we yoqsulluq höküm sürüwatqan, yene bir terepte, bayashatliq we ékispilatatsiye hökümranliq qiliwatqan bu adaletsiz dunya tertipning téximu  köp dawamlishishining mumkin emeslikini tekitligen jumhur reis rejep tayyip erdoghan, mundaq dep körsetti: «musulmanlar hem özlirining huzuri we tinchliqi hemde pütkül insaniyetning bixeterliki we kélechiki namidin mesuliyetni öz üstige élishi, özliri shahit boluwatqan adaletsizlikler aldida téximu küchlük inkas qayturushliri lazim, musulman kishige yarishidighini, eqil – parasetke tayinip ish körüp, jahangirlarning bizni chüshürmekchi bolghan tuzaqlargha chüshüp qalmasliqimiz kérek./ ... hem öz namimizdin hem mezlumlar namidin élip bériwatqan heq we adalet kürishimizde térrorizmgha chétilip qalmasliqimiz, zorawanliqqa yol qoymasliqimiz, qanun – belgilimiler hem pirinsiplardin hergiz chetnep ketmeslikimiz lazim.»