министир қурум керри билән көрүшти
муһит асраш вә шәһәр – базарлаштуруш министири мурат қурум италийәниң наполи шәһиридә «20 – г гуруһи муһит, килимат вә енергийә министирлири йиғини» чақирилған тарихий палаззо раеле сарийида америка килимат музакиричиси җон керри билән көрүшти.
түркийә авази радийоси хәвири: учришишта, министир қурум, түркийәниң 14 маддилиқ килимат өзгириши һәрикәт пиланини түзүп чиққанлиқлири вә иҗра қилғанлиқлирини, қоғдилидиған районлар вә йешил саһәләрниң санини көпәйткәнликлирини ейтти.
түркийәниң парник газини азайтишни әһдә қилғанлиқини әскәрткән қурум, һазирғичә мәзкур әһдиләрдинму төвән сәвийәдә парник гази қойуп бәргәнликини байан қилди.
җумһур рәис рәҗәп таййип әрдоғанниң рәпиқиси әминә әрдоғанниң қизғин қоллиши астида елип бериливатқан нөл ташландуқ лайиһәсини үнүмлүк ишқа ашуруватқанлиқлирини ейтқан қурум, түркийәниң енергийә саһәсидики күчиниң 52 пирсәнтиниң қайта һасил болидиған енергийә мәнбәлиридин тәркиб тапидиғанлиқини, бу мәнидин елип ейтқанда, түркийәниң йавропа бойичә 5-орунда, дунйа бойичә 12- орунда туридиған чоң дөләт икәнликини тәкитлиди.
«париж келишими» дики 1.5 градуслуқ нишанни әмди әмәлгә ашуруш керәк дәп қарайдиғанлиқлирини қәйт қилған кери болса, өзлириниң парижда вәдә қилинған һәммә ишни қилалмиғанлиқлирини, шундақ қилған тәқдирдиму йәр шариниң температурисиниң йәнила 2.5-3 градус өрләйдиғанлиқини, «париж келишими» гә әмәл қилинмиғанлиқи үчүн, йәр шариниң температурисиниң 4 градусқа өрләш хәвипиниң оттуриға чиққанлиқини байан қилди.
пүткүл дунйаниң келимат кризисиниң еғир ақивәтлирини бир тәрәп қилиш мәсулийити барлиқини қәйт қилған керри, мундақ дәп көрсәтти: «20 – г гуруһиниң күчлүк байанат билән оттуриға чиқиши интайин муһим.»
у йәнә, түркийәниң ризә вилайитидә йүз бәргән вә 6 кишиниң җениға замин болған су апити сәвәблик түркийәгә тәзийә билдүрди.
