erdoghan: xelqaraliq sélinma istiratégiyesi yéngi yol xeritisi bolidu
jumhur reis rejep tayyip erdoghan xelqaraliq biwasite sélinma istiratégiyesining yéngi yol xeritisi bolidighanliqini éytti.
türkiye awazi radiyosi xewiri: jumhur reis erdoghan, jumhur reislik mehkimisi sélinma ishxanisi teripidin élan qilinghan «türkiyening 2021 – 2023 – yilliq xelqaraliq biwasite sélinma istiratégiyesi» din orun alghan analizida, türkiyening keng dairilik ishlepchiqirish imkaniyetliri, layaqetlik emgek küchi, istiratégiyelik orni, zamaniwi eshya oboroti ul esliheliri we her bir éhtiyajni qanduralaydighan righbetlendürüsh pilan layiheliri bilen xelqaraliq biwasite meblegh salghuchilarni jelp qilish merkizi bolghanliqini qeyt qildi.
türkiyening 4 saetlik uchush musapisi bilen 1.3 milyardliq nopusqa we 26 tirilyon dollarliq ghayet zor bazargha érishish imkaniyiti sunuwatqanliqini éytqan jumhur reis erdoghan, türkiyening bu soda ewzellikidin bashqa, énérgiye menbelirining sherq – gherb liniyeside, yawropa döletlirige toshushtiki eng ishenchlik ötüsh éghizliridin biri ikenlikini eskertish bilen bir waqitta, türkiyening iqtisadiy jehettin uchqandek tereqqiy qilishining, yéqinqi 19 yil ichide sétiwélish küchini ashurghan ottura sinipning otturigha chiqishini ishqa ashurghanliqini tekitlep mundaq dédi: «her birining nopusi 1 milyondin ashidighan 24 din artuq shehirimiz, élimizning ichki bazirining güllinishide türtkilik rol oynimaqta. otturiche yash nisbiti 32.7 bolghan yash we dinamikiliq nopusimiz bilen, dölet halqighan shirketlerni künséri éshiwatqan yerlik éhtiyaj ul esliheliri bilen teminlimektimiz. yawropa ittipaqigha eza döletler bilen sélishturghanda, eng yash nopusqa ige bir dölet bolghan türkiye, talantliq inzhénérlirining sani jehettimu dunya boyiche aldinqi orunda turmaqta. türkiyening xelqaraliq biwasite meblegh sélish istiratégiyesi, iqtisadiy sahemiz éhtiyajliq boluwatqan qimmetlik xelqaraliq biwasite mebleghlerning dölitimizge sélinishini ishqa ashurush jehettin bir yol xeritisi alahidilikige ige bolidu.»
u yene, türkiyening 2003 – yildin buyan texminen 225 milyard dollarliq xelqaraliq biwasite sélinmini jelp qilishta muweppeqiyet qazanghanliqinimu sözlirige ilawe qildi.
