fahrettin altun natoning istratégiyelik uqumining özgirishi kéreklikini bildürdi

türkiye awazi radiyosi xewiri: jumhur reislik mehkimisi uchur-alaqe idarisining bashliqi fahrettin altun eljezire torida maqale élan qilip, türkiyening 1952-yili natogha eza bolghandin buyan mustehkem nato ittipaqdishi bolghanliqini eskertti.

u türkiyening ortaq xewpsizlik üchün qiyinchiliqlargha qarshi küreshte her daim aldinqi septin orun alghanliqini tekitlep, türkiyening bixeterliki we rayondiki tinchliq üchün natoning waz kechkili bolmaydighan teshkilat ikenlikini qeyt qildi.

u: «yéqinqi 10 yilda özgergen rayonluq xewpsizlik dinamikliridin kéyin, natoning istratégiyelik uqumini yéngilash waqti yétip keldi» dédi.

u yéngi uqumning wuxen wirusi (Kovid-19) din bashqa, yéqinqi yillarda téz sürette özgergen rayonluq we yer shari dinamikliri arisida dölet menpeetlirini ittipaqning menpeetliri bilen muresseleshtürüsh éhtiyajini qobul qilishi kéreklikini eskertip: «ashqun ongchi térrorluq we islamgha qarshi hujumlarni öz ichige alghan halda her türlük térrorluq heqqide oxshash pozitsiye tutush, bulargha qarshi küresh qilish üchün bir istratégiye üstide kélishish eng muhim aldin ehmiyet béridighan ishlardin biri bolushi kérek» dédi.

u türkiyening ittipaqning kolléktip xewpsizlikini qoghdash üchün üstige chüshken wezipisini ada qilishni dawam qilidighanliqini eskertip: «japa-musheqqetlerni bölüshüsh, herbiy xamchotlar we natogha qoshqan töhpiler bilen cheklinip qalmasliqi kérek. oxshash waqitta yene, rayonimizdiki köchmenler kirizisini yingishnimu öz ichige élishi kérek. 4 milyondin artuq köchmenge sahibxanliq qilghan bir dölet bolush süpitimiz bilen, ittipaqdashlirimizdin bu tarixiy sinaqta zimmisige chüshken wezipilirini ada qilishini we téximu ijabiyliqqa ige bolushini ümid qilimiz» dédi.

u térrorluq we rayonluq muqimsizliq tehditlirige duch kelgen türkiyening dölet bixeterlikini qoghdashta yéterlik küchke ige ikenlikini, shundaqla qetiy qarargha ige ikenlikini tekitlep, nahayiti epsuski ittipaqdashlirining türkiyening bu kürishige örnek bolghidek qollashni körsitelmigenlikini qeyt qildi.