әрдоған һәр қайси дөләтләрни һәрикәткә өтүшкә чақирди

түркийә җумһур рәиси рәҗәп таййип әрдоған: «пәләстиндә пүткүл дунйа көрмәскә салсиму, исираилийәниң зулумиға рази болмаймиз» деди.

1639473
әрдоған һәр қайси дөләтләрни һәрикәткә өтүшкә чақирди

түркийә авази радийоси хәвири: җумһур рәис рәҗәп таййип әрдоған адаләт вә тәрәққийат партийәсиниң һәр дәриҗилик тәшкилатлири билән синлиқ шәкилдә өткүзүлгән һейтлишиш паалийитидә сөз қилди.

у: «түнүгүн сүрийә чеграмизни бойлап қурулмақчи болған террорлуқ каридориға қандақ рухсәт қилмиған болсақ, бүгүнму мәсҗиди әқсаниң мәһримигә созулған қолларға охшаш һалда қәтийлик билән қарши чиқимиз» деди.

у һазирғичә 19 дөләтниң пирезиденти вә һөкүмәт башлиқлири билән телефонда көрүшкәнликини билдүрүп: «өзара һейтлаштуқ вә қуддуста һәмдә башқа шәһәрләрдә йашиған вәқәләр тоғрисидики әндишәлиримизни ортақлаштуқ. қисқиси, дипломатийәни қанат йайдурдуқ. исираилийәниң пәләстин шәһәрлири вә қуддустики һуҗумлириға қарши чиқиш инсанийәниң бурчи. исираилийә төккән қанларға, қилған һөрмәтсизликлиригә аваз чиқармай йаки очуқ-ашкара шерик болғанлар, бир күни нөвәтниң өзлиригә келидиғанлиқини билиши лазим» деди.

у сөзини мундақ ахирлаштурди:

«исираилийәниң һуҗумлириға қарши етиқади, миллити вә мәзһипи немә болушидин қәтийнәзәр, һәр бир дөләтни, һәр қайси идарә-органларни балдуррақ һәрикәткә өтүшкә дәвәт қилимиз.»



مۇناسىۋەتلىك خەۋەرلەر