chawushoghlu: türkiye bosniye-gértségowinani dawamliq qollaydu

türkiye awazi radiyosi xewiri: tashqi ishlar ministiri mewlüt chawushoghlu bosniye-gértségowina tashqi ishlar ministiri biséra türkowij bilen ayrim we heyetler ara uchrishishlirini axirlashturghandin kéyin, birlikte axbarat élan qilish yighini ötküzdi.

mewlüt chawushoghlu bosniyelik mensepdéshi bilen bolghan uchrishishning ünümlük bolghanliqini bildürüp: «siyasiy jehettiki mukemmel munasiwetlirimizni bashqa sahelerdimu qandaq tereqqiy qildurush mesilisini barliq dostlirimiz bilen birlikte muzakire qilduq» dédi.

u türkiyening her qachan bosniye-gértségowina we xelqini héchqandaq ayrimchiliq qilmastin dawamliq qollaydighanliqini eskertip: «qolimizdin kélishiche waksina yardimini qilduq, waksina bilen teminleshke tirishiwatimiz, milliy waksinalirimiz pat arida emlinishke bashlinidu» dédi.

u türkiyening bosniye-gértségowinaning zémin pütünlüki toghrisida otturida ayliniwatqan qeghezler toghrisida naraziliqini otturigha qoyghanliqini bildürüp: «bu xil munazirelerning rayon üchünla emes, belki pütkül yawropa üchün xeterlik ikenlikini yene bir qétim tekitleshni xalaymen» dédi.

u tünügünki (2021-yili 4-may) silowéniye ziyaritidimu mezkur mesilini küntertipke élip kelgenlikini we silowéniye rehberliriningmu bu höjjetlerni qobul qilmighanliqini eskertip, otturigha tashlanghan ismi yoq, yaman niyetlik matériyallarning héchkimge paydisi yoqluqini qeyt qildi.

bosniye-gértségowina pirézidéntliq kéngishining ezalirimu mewlüt chawushoghluni huzurlirida qobul qildi.

bosniye-gértségowina pirézidéntliq kéngishining bashliqi milorad dodik, kéngeshning boshnaq ezasi sefik dzaferowij we kéngeshning xirwat ezasi zéljko komsij qatarliqlar mewlüt chawushoghlu bilen körüshti.

mewlüt chawushoghlu twittérda bu heqte hembehirligen uchurida: « bosniye-gértségowinaning siyasiy ittipaqliqi, zémin pütünlüki we igilik hoquqini qollaydighanliqimizni tekitliduq. dost we qérindash bosniye-gértségowinani qollaymiz» dédi.