чавушоғлу: түркийә боснийә-гертсеговинани давамлиқ қоллайду

түркийә авази радийоси хәвири: ташқи ишлар министири мәвлүт чавушоғлу боснийә-гертсеговина ташқи ишлар министири бисера түрковиҗ билән айрим вә һәйәтләр ара учришишлирини ахирлаштурғандин кейин, бирликтә ахбарат елан қилиш йиғини өткүзди.

мәвлүт чавушоғлу боснийәлик мәнсәпдеши билән болған учришишниң үнүмлүк болғанлиқини билдүрүп: «сийасий җәһәттики мукәммәл мунасивәтлиримизни башқа саһәләрдиму қандақ тәрәққий қилдуруш мәсилисини барлиқ достлиримиз билән бирликтә музакирә қилдуқ» деди.

у түркийәниң һәр қачан боснийә-гертсеговина вә хәлқини һечқандақ айримчилиқ қилмастин давамлиқ қоллайдиғанлиқини әскәртип: «қолимиздин келишичә ваксина йардимини қилдуқ, ваксина билән тәминләшкә тиришиватимиз, миллий ваксиналиримиз пат арида әмлинишкә башлиниду» деди.

у түркийәниң боснийә-гертсеговинаниң земин пүтүнлүки тоғрисида оттурида айлиниватқан қәғәзләр тоғрисида наразилиқини оттуриға қойғанлиқини билдүрүп: «бу хил муназирәләрниң район үчүнла әмәс, бәлки пүткүл йавропа үчүн хәтәрлик икәнликини йәнә бир қетим тәкитләшни халаймән» деди.

у түнүгүнки (2021-йили 4-май) силовенийә зийаритидиму мәзкур мәсилини күнтәртипкә елип кәлгәнликини вә силовенийә рәһбәрлириниңму бу һөҗҗәтләрни қобул қилмиғанлиқини әскәртип, оттуриға ташланған исми йоқ, йаман нийәтлик материйалларниң һечкимгә пайдиси йоқлуқини қәйт қилди.

боснийә-гертсеговина пирезидентлиқ кеңишиниң әзалириму мәвлүт чавушоғлуни һузурлирида қобул қилди.

боснийә-гертсеговина пирезидентлиқ кеңишиниң башлиқи милорад додик, кеңәшниң бошнақ әзаси сәфик дзафәровиҗ вә кеңәшниң хирват әзаси зелҗко комсиҗ қатарлиқлар мәвлүт чавушоғлу билән көрүшти.

мәвлүт чавушоғлу твиттерда бу һәқтә һәмбәһирлигән учурида: « боснийә-гертсеговинаниң сийасий иттипақлиқи, земин пүтүнлүки вә игилик һоқуқини қоллайдиғанлиқимизни тәкитлидуқ. дост вә қериндаш боснийә-гертсеговинани қоллаймиз» деди.