түркийә йасин йилдиримниң истепа беришкә мәҗбурлинишиға наразилиқ билдүрди

түркийә авази радийоси хәвири: түркийә җумһурийити ташқи ишлар министирлиқиниң муавин министири йавуз сәлим қиран, фирансийәдә әрмән террорлуқ тәшкилати — асаланиң һуҗумида шеһит болған түрк дипломатлири хатириләнгән бир учурни йақтурған түрк шәһәрлик һөкүмәт мәҗлиси әзаси йасин йилдиримниң истепа беришкә мәҗбурлинишиниң қобул қилғили болмайдиған қилмиш икәнликини оттуриға қойди.

йавуз сәлим қиран тивиттердики адресида учур һәмбәһриләп, әрмән террорчиларниң һуҗумлирида шеһит болуп кәткән түрк дипломатларға мунасивәтлик бир көрүнүшни йақтурған валенс шәһәрлик һөкүмәттә комитет әзалиқи вәзиписини өтәватқан йасин йилдимниң истепа бәргүзүлгәнликигә наразилиқ билдүрди.

пурсәтла тапса пикир әркинлики тоғрисида дәрс биришкә урунуп келиватқанларниң, арамлирини бузуп қойидиған пакитларға дуч кәлгәндә, һәр хил зулумларни қилишни өзлириниң йоллуқ һоқуқи дәп қарайдиғанлиқини әскәрткән қиран: «асала террорлуқ тәшкилати шеһит қиливәткән дипломатлиримизни йад әткән бир сийасийонниң истепа беришкә мәҗбурлинишини қобул қилғили болмайду» деди.

фирансийәниң валенс шәһәрлик һөкүмәт мәҗлисидә комитет әзаси болуп ишләватқан йасин йилдим, иниси иҗтимаий алақә торида һәмбәһирлигән түркийә ташқи ишлар министирлиқиниң «әрмән террорлуқ һуҗумида шеһит болған дипломатлиримиз» намлиқ фото – сүритини йақтурғандин кейин, әрмән җәмийәтлириниң бесим вә шикайәтлиригә дуч кәлгән шәһәрлик һөкүмәт башлиқи николас дарагон йилдиримдин истепа беришини тәләп қилди.

йилдирим бесимлар сәвәбидин хизмитидин истәпа беришкә мәҗбур болди.