halachoghlu: ermen dewalirining asassizliqi pakitlar arqiliq otturigha qoyuldi

türkiye awazi radiyosi xewiri: türk tarix jemiyitining sabiq reisi piroféssor doktor yusuf halachoghlu, 1915- yili weqelirige dair eyibleshlerning heqiqetni eks ettürmeydighanliqini we bularning chet el höjjetliridimu éniq bayan qilinghanliqini éytti.

piroféssor doktor yusuf halachoghlu trakya uniwérsitéti teripidin uyushturulghan «ermen dewaliri we tarixiy pakitlar» namliq tor yighinida söz qilip, ermen dewalirining tarixiy höjjetler arqiliq ret qilinghanliqini otturigha qoydi.

halachoghlu, ermenlerning burundin tartipla ilmiy tetqiqatlarni bir chetke qayrip qoyup, gherb döletlirining yétekchilikide özlirining dewalirining küntertiptiki ornini saqlap kelgenlikini éytti.

u, ermeni mesilisining hel qilinishini amérika qoshma ishtatliri we gherb döletlirining xalimaydighanliqini, mezkur dewalarni türkiyege qarshi kozir qilip ishlitiliwatqanliqini bildürdi.

türk tarix jemiyitining etrapliq tetqiqatlarni élip bérish we arxiplarni tekshürüsh arqiliq heqiqetni pakitliri bilen otturigha qoyghanliqini tilgha alghan halachoghlu: «bashta amérika qoshma ishtatliri bolup engliye, firansiye, gérmaniye, milletler jemiyiti arxipi, rusiye we iran arxiplirining hemmisini bashtin  - axir tekshürduq. biz bu rayonlardin 100 ming bettin artuq höjjet topliduq. biz qolgha keltürgen netijiler ilgiri sürülginidek ermenlerning qirghin qilinghanliqini yaki dölet teripidin mushundaq qilinghanliqini körsetmidi. osmanli emeldarliri yollarda ermenlerge hujum qilghan, ularning mal – mülüklirini bulighan we ularni qetl qilghanlarni qolgha chüshürüp jazalighanidi. 1915- yili 1673 adem sotqa tartildi» dégenlerni qeyt qildi.

yusuf halachoghlu, 1914- yilidin 1922- yilighiche bolghan ariliqta, 518 ming musulman türkning erméniye shaykiliri teripidin öltürülgenliki toluq pakitlar arqiliq otturigha qoyuldi, dégenlerni sözlirige ilawe qildi.