chawushoghlu türkiye – ruminiye – polsha yighinigha qatnishidu
tashqi ishlar ministiri mewlüt chawushoghlu 22 – 23 – aprél künliri ruminiyening paytexti bükreshte chaqirilidighan türkiye – ruminiye – polsha tashqi ishlar ministirliri yighinigha qatnishidu.
türkiye awazi radiyosi xewiri: türkiye tashqi ishlar ministirliqi teripidin élan qilinghan yazma bayanatta, 2016 – yildin buyan sistémiliq halda ötküzülüwatqan yighingha, chawushoghluning hemrahliqidiki heyet bilen qatnishidighanliqi qeyt qilindi.
bayanatta, yighin dairiside 3 ittipaqdash dölet otturisidiki ijabiy hemkarliq sahelirining közdin kechürülüshi we hemrahliq munasiwetlirini yenimu chongqurlashturush imkaniyetliri heqqide muzakire élip bérilishining pilanliniwatqanliqi bildürüldi.
ukraina we giruziye tashqi ishlar ministirliriningmu yighinning bir qismigha ishtirak qilishining pilanliniwatqanliqi eskertilgen bayanatta, mundaq déyildi: «bu yilqi yighin, kéler qétimliq shimaliy atlantik ehdi teshkilati bashliqlar yighinigha toghra kélip qalghanliqi üchün, 3 ittipaqdash döletning bu yighindin we kéyinki basquchtin kütidighanliqlirining muzakire qilinishi üchünmu muhim bir purset hésablinidu.»
