chawushoghlu türkiye heyitining may éyida misirni ziyaret qilidighanliqini bildürdi

türkiye awazi radiyosi xewiri: türkiye tashqi ishlar ministiri mewlüt chawushoghlu bir téléwiziye qanilining neq meydan pirogrammisigha qatniship, küntertip toghrisidiki soallargha jawab berdi.

u misir bilen bolghan munasiwetler üstide toxtalghanda, deslepte ikki döletning istixbarat organliri otturisida qurulghan qanalning tashqi ishlar ministirliqliri wastisi bilen dawam qilishi mesiliside pikir birlikige ige ikenliklirini qeyt qildi.

u: «misir türkiyedin bir heyet teklip qildi. may éyida bir heyet misirgha baridu» dédi.

u heyetning muawin ministirlar sewiyeside bolidighanliqini, kéyinche özining misir tashqi ishlar ministiri bilen körüshüshi mumkinlikini eskertti.

u yéqinqi yillarda girétsiye bilen bolghan munasiwetlerning keskinleshken halda dawamlashqanliqini alahide tekitlep, buninggha aféna terepning heddidin ziyade selbiy pozitsiyesi sewebidin peyda bolghanliqini qeyt qildi.

u girétsiye tashqi ishlar ministiri nikos déndiyasning bügün (2021-yili 15-aprél) enqerede ziyarette bolidighanliqini bildürüp, ikki dölet otturisidiki diyalog we yuqiri derijilik ziyaretlerning ehmiyitini tekitlidi.

u ikki qoshna döletning uchrishish üchün yawropa ittipaqi yaki bashqa döletke éhtiyajliq emeslikini eskertip: «girétsiye bilen kélishelmigen mesililirimiz bar, bularni ochuq  we semimiy halda söhbetlishishimiz kérek. biz barliq mesililirimizni söhbetlishishke teyyarmiz» dédi.

u ikki dölet otturisida özara pikir almashturush uchrishishlirining qayta bashlanghanliqini we siyasiy muzakirelerning ötküzülgenlikini bildürüp, girétsiyelik mensepdéshi bilen kélishelmigen barliq mesililer üstide semimiy shekilde söhbetlishishni pilan qilghanliqini bildürdi.

u shiéytsariyening jenwe shehiride ötküzülgen qibris yighinliri toghrisida mundaq dédi:

«shimaliy qibris türk jumhuriyitining sabiq jumhur reisi hörmetlik mustafa akinji bilen birlikte hem b d t gha hemde yawropa ittipaqigha etigendin kechkiche fédératsiye mesilisini chüshendurduq. burun pikir birliki hasil qilinghan mesililerde arqigha qedem tashlandi. emma, jenubiy qibris rum hakimiyiti rehbiri nikos anastasiyadis, ‹men bir nerse déyishni xalimaymen› dédi. rum terep dawamliq arqigha qedem tashlimaqta. yene 30-20 yil muzakire qilsaqmu netije chiqmaydu. 53 yil muzakire qilduq, netije chiqmidi. bolmaydighan ishni zorlighanning paydisi yoq.»

u qaradéngizdiki yirikchilikler toghrisida toxtalghanda, türkiyening qaradéngizning tinchliq déngizi bolushni xalaydighanliqini, bu yerde barliq sahildash döletlerning bir yerge kélip déngiz hoquqi sahelirini belgilesh mesiliside pikir birliki hasil qilghanliqini bildürdi.

u hazirqi ukraina-rusiye yirikchilikining, qaradéngizning tinchliq déngizi bolushigha kölengge chüshüridighanliqini eskertip, türkiyening bu mesilini tinchliq bilen hel qilishni qollaydighanliqini tekitlidi.

u türkiyening hem rusiye hemde ukraina bilen yaxshi munasiwetlerge ige ikenlikini, ochuq we semimiy halda siyaset yürgüzgenlikini qeyt qildi.

amérika paraxotlirining boghuzlardin ötüshining emeldin qaldurulghanliqi üstide toxtalghanda, amérikaning buni türkiyege aghzaki yetküzgenlikini, hazirche uqturushning yazmiche kelmigenlikini bildürdi.

u paraxotlar bügün ötmigen ehwalda 15 kün burun bildürüsh musapisining qayta bashlinidighanliqini alahide eskertip: «türkiye montrö shertnamisini ijra qilidu. buningdin rusiye yaki bashqa dölet endishe qilmasliqi kérek» dédi.

u qaide-pirinsilar we cheklimilerning nahayiti éniq ikenlikini, boghuzlardin ötüshning bu ramkida bolidighanliqini, qanal istanbul layihesining montrö shertnamisige xilap emeslikini qeyt qildi.