чавушоғлу афғанистан дипломатийә министири билән телефонлашти
ташқи ишлар министири мәвлүт чавушоғлу афғанистан дипломатийә министири һаниф артмар билән телефонда көрүшти.
түркийә авази радийоси хәвири: дипломатик мәнбәләрниң билдүрүшичә, икки министирниң түнүгүн (2021-йили 11-апрел) елип берилған телефон сөһбитидә, «истанбул конферанси» ға мунасивәтлик өзгиришләр һәққидә музакирә елип берилған.
түркийә, афғанистанда тинчлиқ мусаписи үчүн бирләшкән дөләтләр тәшкилати вә қатар билән мас қәдәмдә афғанистандики тәрәпләр билән учришишларни елип бармақта.
дөләт мудапиә министирлиқи, истанбулдики йиғин үчүн иштиракчи дөләтләр, вәкилләрниң сәвийәлири вә иштиракчи тәртипи һәққидә хизмәт ишлимәктә, һәмдә иштирак мәсилилири тоғрулуқ мунасивәтлик тәрәпләр билән қойуқ кеңәш елип бармақта.
ташқи ишлар министири мәвлүт чавушоғлу, афғанистан вә қатар дипломатийә министирлиридин сирт йәнә, мунасивәтлик дөләтләрниң рәһбәрлири биләнму телефонда көрүшмәктә.
дипломатик мәнбәләр, афғанистандики тәрәпләр билән музакириләрниң очуқ – ашкара һалда елип бериливатқанлиқини, түркийәниң һәр икки тәрәпниңму ишәнчисигә саһиб болушиниң муһим алаһидилик икәнликини әскәртмәктә.
