kommuniist térrorluq teshkilati d h k p-j ning yuqiri derijilik mesulliri istanbulda qolgha chüshti
kommuniist térrorluq teshkilati d h k p-j ning atalmish türkiye mesuli yasemin qaradagh bilen atalmish memurlar mesuli yeter gönül aydin istanbulda élip bérilghan herikette qolgha chüshti.
türkiye awazi radiyosi xewiri: istanbul saqchi idarisi istixbarat etriti bilen térorluqqa qarshi turush shöbisi etriti hemkarliship élip barghan xizmetler we tekshürülgen sanliq melumatlar netijiside yasemin qaradaghning térrorluq teshkilati d h k p-j ning atalmish türkiye mesuli ikenliki éniqlandi.
ichki ishlar ministirliqi teripidin teyyarlanghan izdep tutush kéreklik térrorchilar tizimlikide «külreng» katégoriyede orun alghan we tutulghandin kéyin türmige tashlanghan jaféri sadiq eroghludin kéyin, gumandar yasemin qardaghning teshkilatning atalmish türkiye mesuli bolup teyinlengenliki bildürüldi.
tekshürülgen sanliq melumatlar netijiside yene, 2000-yildin buyan 3 qétim türmide yatqan jinayet gumandari yeter gönul aydinning bolsa, bu teshkilatqa atalmish memurlar mesuli bolup teyinlengenliki éniqlandi.
téxnikiliq we fizikiliq iz qoghlashni dawamlashturghan etret, bu teshkilatning mexpiy öyide yoshurunghan yeter gönul aydin bilen yasemin qaradaghni belgilengen adréstin tengla qolgha chüshürdi.
gumandarlarning saqchi idarisidiki resmiyetliri dawamlashmaqta.