чавушоғлу таҗикстан ташқи ишлар министири билән көрүшти

түркийә авази радийоси хәвири: түркийә ташқи ишлар аминистири мәвлүт чавушоғлу таҗикстанда, ташқи ишлар министири сироҗиддин муһриддин билән көрүшкәндин кейин бирликтә мухбирларни күтүвелиш йиғини өткүзди.

у көрүшүштә, икки дөләт мунасивәтлирини тәрәққий қилдуруш үчүн басалайдиған қәдәмләрни музакирә қилғанлиқлирини билдүрүп, мушу йил (2021) ичидә вә кәлгүсидә әмәлгә ашурулидиған өзара зийарәтләр үстидиму тохталди.

у түркийә җумһур рәиси рәҗәп таййип әрдоғанниң вухән вируси (Kovid-19) сәвәбидин кечиктүрүшкә мәҗбур қалған таҗикстан зийаритини, мумкин болса,  бу йил ичидә әмәлгә ашурушни халайдиғанлиқини вә бу зийарәт вәсилиси билән һәмкарлиқ кеңиши йиғинини өткүзүшни халайдиғанлиқлирини қәйт қилди.

у рәҗәп таййип әрдоғанниң таҗикстан пирезиденти имамәли рахманни 18-20-ийун күнлири өткүзүлидиған «анталйа дипломатийә мунбири» дә күтүвелиштин мәмнунлуқ һес қилидиғанлиқини әскәртти.

у таҗикстан пуқралириниң түркийәгә визисиз келәләйдиғанлиқини вә 90 күн туралайдиғанлиқини билдүрүп: «иншааллаһ алдимиздики күнләрдә, һазир бу тоғрида хизмәтләрни ишләватимиз, таҗикстанму түркийә пуқралириға қарита визини әмәлдин қалдурар» деди.

у түркийә һава йоллири ширкитиниң таҗикстанға техиму көп айропилан сәпири қойушни халайдиғанлиқини вә бу мәсилидә таҗикстан органлиридин қоллашни тәләп қилидиғанлиқлирини тәкитлиди.

у: «түркийәдә өткүзүлидиған афғанистан йиғинида, қериндишим сироҗиддин муһриддинни көрүштин хушаллиқ һес қилимән» деди.