erdoghan gérmaniye bash ministiri mérkél bilen körüshti

türkiye awazi radiyosi xewiri: jumhur reislik mehkimisi uchur-alaqe idarisi jumhur reis rejep tayyip erdghan bilen gérmaniye bash ministiri angéla mérkélning körüshkenliki toghrisida bayanat élan qildi.

bayanatta, ikki rehberning türkiye-gérmaniye munasiwetliri we rayonluq mesililerni muzakire qilghanliqi bildürüldi.

rejep tayyip erdoghan gérmaniye bash ministiri angéla mérkél bilen pilanliq uchrishish we diyalogning dawamigha köp ehmiyet béridighanliqini eskertti.

türkiyening wuxen wirusi (Kovid-19) gha qarshi turushning qetiylik bilen dawamlishiwatqanliqini, qedemmu qedem we kontrolluq normallishish musapisini bashlighanliqini, waksina emlesh pirogrammisinimu tézleshtürgenlikini tilgha alghan rejep tayyip erdoghan, ijabiy özgirishler bilen birlikte aprél éyida sayahetchilikning tosqunsiz we bixeter halda bashlinidighanliqigha ishinidighanliqini éytti.

rejep tayyip erdoghan yene, süriyede insaniy yardemge éhtiyajliq bolghan milyonlarche süriyelikni emeliyette qoghdighan we yardem qiliwatqan birdinbir döletning türkiye ikenlikini tilgha élip, özlikidin qaytishta, yawropa ittipaqining iqtisadiy we téxnikiliq jehettin qollishi kéreklikini eskertti.

u «18-mart kélishimi» ni yéngilash mesilisinimu tilgha aldi we türkiyening sherqiy aqdéngiz, ege mesililiridimu ijabiy pozitsiyesini dawamlashturuwatqanliqini qeyt qildi.

u liwiyede yéngi hökümetning ishench awazigha ériship, baldurraq wezipisini bashlishining muhim ehmiyetke ige ikenlikini bildürdi.

erdoghan-mérkél körüshüshide, tashqi ishlar ministiri mewlüt chawushoghlu, adalet we tereqqiyat partiyesining bayanatchisi ömer chelik, jumhur reislik mehkimisi uchur-alaqe idarisining bashliqi fahrettin altun we jumhur reislik mehkimisining bayanatchisi ibrahim kalin qatarliqlar birge boldi.