erdoghan bitlis shéhitlirini axiretke uzitip qoyush murasimida söz qildi

türkiye awazi radiyosi xewiri: paytext enqerediki ehmed hamdi aqseki jameside, bislista meydangha kelgen tik uchar ayropilan qazasida shéhit bolghan 11 eskerni axiretke uzitip qoyush murasimi ötküzüldi.

murasimgha, jumhur reis rejep tayyip erdoghan, türkiye büyük millet mejlisi bashliqi mustafa shentop, muawin jumhur reis fuat oktay, jumhuriyet xelq partiyesi rehbiri kemal qilichdaroghlu, milliyetchi heriket partiyesi rehbiri dölet bahcheli, dölet mudapie ministiri xulusi aqar, muhit asrash we sheherchilik ishliri ministiri murat qurum, bash ishtab bashliqi général yashar güler we herqaysi armiyelerning qomandanliri ishtirak qildi.

jumhur reis erdoghan, murasimda qilghan sözide, mundaq dédi: «armiyemizge, millitimizge rebbimdin sewr - taqet tileymen, biz shéhitlirimizning diyanitige mohtajmiz, derweqe, ular biz üchün seperge atlanghanidi, shéhitlik mertiwési bularning ichidiki eng aliysi hésablinidu, rebbim bizgimu bu mertiwéni nésip qilghay, din üchün, weten üchün jan pida qiliwatqan her bir qehrimanning bu meritiwétige yételishi mumkin emes, rebbimning bizgimu buni nésip qilishini ümid qilimen»

türkiye dölet mudapie ministirliqi, bingöldin tatwangha kétish üchün tünügün saet 13.55 te qozghalghan quruqluq armiye qomandanliq ishtabigha qarashliq « Cougar» tipliq tik uchar ayropilan bilen saet 14.25 te alaqining  üzülüp qalghanliqini, rayonda élip bérilghan tekshürüshler netijiside, tik uchar ayropilanning éhtiyatsizliqtin buzulghanliqini, buning netijiside qaza meydangha kelgenlikini bildürgenidi.

deslepte élan qilinghan bayanatta, 9 herbiy xadimning shéhit bolghanliqi, 4 xadimning yarilanghanliqi, yaridar 2 eskerning doxturxanida dawalash ünüm bermey hayatidin ayrilghanliqi, shuning bilen, shéhitlar sanining 11 ge yetkenliki uqturulghanidi.

mezkur tik uchar ayropilanning, bitlis wilayitining tatwan nahiyesige qarashliq chekmeje yézisi etrapida chüshüp kétishi netijiside shéhit bolghan eskerlerning jesetliri bilen yaridar eskerler, neq meydandin qutquzush aptomobilliri arqiliq bitlis – tatwan döletlik doxturxanisigha élip bérilghanidi.