әрдоған битлис шеһитлирини ахирәткә узитип қойуш мурасимида сөз қилди

түркийә авази радийоси хәвири: пайтәхт әнқәрәдики әһмәд һамди ақсәки җамәсидә, бислиста мәйданға кәлгән тик учар айропилан қазасида шеһит болған 11 әскәрни ахирәткә узитип қойуш мурасими өткүзүлди.

мурасимға, җумһур рәис рәҗәп таййип әрдоған, түркийә бүйүк милләт мәҗлиси башлиқи мустафа шәнтоп, муавин җумһур рәис фуат октай, җумһурийәт хәлқ партийәси рәһбири кәмал қиличдароғлу, миллийәтчи һәрикәт партийәси рәһбири дөләт баһчәли, дөләт мудапиә министири хулуси ақар, муһит асраш вә шәһәрчилик ишлири министири мурат қурум, баш иштаб башлиқи генерал йашар гүләр вә һәрқайси армийәләрниң қоманданлири иштирак қилди.

җумһур рәис әрдоған, мурасимда қилған сөзидә, мундақ деди: «армийәмизгә, миллитимизгә рәббимдин сәвр - тақәт тиләймән, биз шеһитлиримизниң дийанитигә моһтаҗмиз, дәрвәқә, улар биз үчүн сәпәргә атланғаниди, шеһитлик мәртивеси буларниң ичидики әң алийси һесаблиниду, рәббим бизгиму бу мәртивени несип қилғай, дин үчүн, вәтән үчүн җан пида қиливатқан һәр бир қәһриманниң бу мәритиветигә йетәлиши мумкин әмәс, рәббимниң бизгиму буни несип қилишини үмид қилимән»

түркийә дөләт мудапиә министирлиқи, бингөлдин татванға кетиш үчүн түнүгүн саәт 13.55 тә қозғалған қуруқлуқ армийә қоманданлиқ иштабиға қарашлиқ « Cougar» типлиқ тик учар айропилан билән саәт 14.25 тә алақиниң  үзүлүп қалғанлиқини, районда елип берилған тәкшүрүшләр нәтиҗисидә, тик учар айропиланниң еһтийатсизлиқтин бузулғанлиқини, буниң нәтиҗисидә қаза мәйданға кәлгәнликини билдүргәниди.

дәсләптә елан қилинған байанатта, 9 һәрбий хадимниң шеһит болғанлиқи, 4 хадимниң йариланғанлиқи, йаридар 2 әскәрниң дохтурханида давалаш үнүм бәрмәй һайатидин айрилғанлиқи, шуниң билән, шеһитлар саниниң 11 гә йәткәнлики уқтурулғаниди.

мәзкур тик учар айропиланниң, битлис вилайитиниң татван наһийәсигә қарашлиқ чәкмәҗә йезиси әтрапида чүшүп кетиши нәтиҗисидә шеһит болған әскәрләрниң җәсәтлири билән йаридар әскәрләр, нәқ мәйдандин қутқузуш аптомобиллири арқилиқ битлис – татван дөләтлик дохтурханисиға елип берилғаниди.