türkiye ereb elliri ittipaqining qararlirini pütünley ret qildi

türkiye awazi radiyosi xewiri: türkiye jumhuriyiti tashqi ishlar ministirliqi yazma bayanat élan qilip: «ereb elliri ittipaqi tashqi ishlar ministirliri kéngishining 2021- yili 3- marttiki yighinida dölitimizge qarita chiqirilghan asassiz qararlarni pütünley ret qilimiz» dédi.

chiqirilghan qararlarning ereb xelqlirining neziride héchqandaq qimmitining yoqluqi bayan qilinghan bayanatta: «ereb elliri ittipaqigha eza bir qisim döletlerning özlirining weyran qilghuch paaliyetlirini yoshurush meqsitide dölitimizge qaratqan qéliplashqan eyibleshlirini dawamlashturushta ching turushining dost we qérindash ereb xelqi neziride inawitining yoqluqini ereb elliri ittipaqi ezalirimu nahayiti yaxshi bilidu» dégen ibarilerge orun bérildi.

bezi ezalarning bu qararlargha qarshi chiqip, izahat bergenlikige isharet qilinghan bayanatta: «eza döletler otturisida ochuq söhbet élip bérilmastin, her xil qatlamlar teripidin téngilishi netijiside qobul qilinghan bu xil qararlargha bir qisim ereb elliri ittipaqi ezaliriningmu qarshi chiqanliqi yaki izahat bergenliki körülmekte» déyildi.

«türkiye pirinsipliq we qetiy meydani bilen rayon we dunyaning bixeterlik, muqimliq we xatirjemlikni qoghdash üchün eng zor tirishchanliq körsetken döletlerning biri» dégen ibarilerge orun bérilgen bayanatta, türkiyening rayon siyasitining eng muhim nuqtisining ereb döletlirining igilik hoquqi we zémin pütünlükini qoghdilishi bilen siyasiy birlikining turghuzulushi ikenliki tekitlendi.

bayanatta yene: «biz ereb elliri ittipaqini asassiz eyiblesh arqiliq dölitimizge hujum qilishning ornigha ereb xelqining tinchliqi, güllinishi we bext - saaditini aldinqi orungha qoyushqa we rayonda bixeterlik we muqimliq ornitishqa ijabiy töhpe qoshushqa yene bir qétim teklip qilimiz» dégen ibarilergimu orun bérildi.