қалин: байдин һөкүмити терроризм сийаситини өзгәртиши керәк
җумһур рәислик мәһкимиси байанатчиси ибраһим қалин, америка қошма иштатлириниң терроризмни қоллаватқанлиқини, пирезидент җо байдин һөкүмитиниң бу сийасәтни өзгәртиши лазимлиқини ейтти.
түркийә авази радийоси хәвири: қалин, күнтәрипкә алақидар өзгиришләр һәққидә елан қилған байанатида, түркийә – америка қошма иштатлири мунасивәтлириниң наһайити узунға созулидиғанлиқини тәкитләп мундақ деди: «бу тарихий басқуч мабәйнидә нурғун оңушсизлиқлар оттуриға чиқти, охшимиған һөкүмәтләр һакимийәт бешиға чиққанда, пат-пат мунасивәтлиримиз наһайити йахши вә үнүмлүк болған мәзгилләрниму баштин кәчүрдуқ, сүркилишлик дәврләрниму баштин кәчүрдуқ, әмма өзгәрмигән бир әһвал бар, у болсиму түркийәниң райондики истиратегийәлик әһмийитиниң һечқачан азаймиғанлиқидур.»
байдин һөкүмитиниң түркийәниң истиратегийәлик әһмийити сәвәблик әнқәрә билән һәмкарлиқ асасида һәрикәт қилидиғанлиқини ейтқан қалин, мундақ дәп көрсәтти: «әлвәттә өзара ихтилаплиқ бәзи мәсилиләр бар, < F 35 > типлиқ уруш айропиланлириниң түркийәгә сетип берилиши, CAATSA ембарголири, <400 – с> башқурулидиған бомба мудапиә системиси қатарлиқлар бир йүрүш мәсилә сүпитидә оттурида турмақта, фәтһуллаһчи террорлуқ тәшкилатиниң америка қошма иштатлиридики мәвҗудийити вә буларға қарши техичә түркийәни қайил қилалиғудәк бирәр хизмәтниң ишләнмәслики, бөлгүнчи террорлуқ тәшкилати п й д/й п г гә йардәм берилиши қатарлиқ мәсилиләр бизниң асаслиқ мәсилә саһәлиримизни тәшкил қилиду.»
америка қошма иштатлириниң бөлгүнчи террорлуқ тәшкилати п й д/й п г ни қоллишиниң түркийәниң миллий бихәтәрликигә биваситә тәһдит шәкилләндүридиған бир мәсилә икәнликини әскәрткән қалин, мундақ деди: «бөлгүнчи террорлуқ тәшкилати п й д/й п г мәсилисидә, америка қошма иштатлириниң хата сийаситидә чиң туруши, сүрийә киризисигә һечқандақ һәл қилиш чариси болалмиғинидәк, икки тәрәп мунасивәтлиримизгиму техиму көп зийан йәткүзмәктә, шуңа, байдин һөкүмити бу сийасәтни җиддий бир шәкилдә өзгәртиши керәк.»
