jumhur reis erdoghan ete «kishilik hoquq heriket pilani»ni élan qilidu

türkiye awazi radiyosi xewiri: ete (seyshenbe) élan qilinishi jakarlanghan kishilik hoquq heriket pilanining hel qilghuch nishanining «yéngi shundaqla puqrawi asasiy qanuni tüzüp chiqish» ikenliki qeyt qilindi.

jumhur reis erdoghan teripidin élan qilinidighan «kishilik hoquq heriket pilani» pirogrammisigha, siyasiy partiyelerning rehberlirimu teklip qilindi.

türkiye waqti saet 13:30 da bashlinidighan yighin beshtepe millet qurultay we medeniyet merkizide ötküzülidu.

yighingha yene, türkiye büyük milliy mejlisi (parlaménti) reisi mustapa shentop, yuqiri sot mehkimilirining bashliqliri, jumhur reislik mehkimisi kabinét ezaliri, gheyriy musulman jamaetlerning wekilliri, bash elchiler bilen birleshken döletler teshkilati, yawropa ittipaqi, yawropa kéngishi, yawropa kishilik hoquq sot mehkimisi wekilliri, ammiwi teshkilatlarning bashliqliri, aliy mekteplerning mudirliri, fakultét mudirliri, akadémiklar, adwokatlar we zhurnalistlar ishtirak qilidu.

kishilik hoquq heriket pilani, türkiyening asasliq siyaset höjjiti bolidu. bu pilan qanun we memuriy paaliyetlerni ochuq – ashkariliq we jawabkarliqni sürüshtürüsh asasida bir terep qilidu. mal - mülük hoquqi, érishilgen hoquq, jinayet we jazaning xaraktéri, shundaqla gunahsizliqning asas ikenliki pirinsipi küchlük tekitlinidighan mezkur pilan arqiliq bu sahelerde her xil özgirishlerning royapqa chiqirilishi közde tutulmaqta.