chawushoghlu: türkiye afghanistanning xewpsizlikige hesse qoshuwatidu

türkiye tashqi ishlar ministiri mewlüt chawushoghlu türkiyening telim-terbiye we qorallandurush jehette qiliwatqan yardemliri bilen, afghanistanning xewpsizlikige hesse qoshuwatqanliqini bildürdi.

1592914
chawushoghlu: türkiye afghanistanning xewpsizlikige hesse qoshuwatidu

türkiye awazi radiyosi xewiri: tashqi ishlar ministiri mewlüt chawushoghlu türkiye we afghanistan otturisida diplomatik munasiwet ornitilghanliqining 100-yili munasiwiti bilen, afghanistan tashqi ishlar ministiri hanif atmarning sahibxanliqida paytext kabulda ötküzülgen tebriklesh paaliyitige, widéo arqiliq qatnashti.

u ikki dölet munasiwetlirining ortaq tarix we medeniyet etrapida shekillengenlikini bildürüp: «xelqlirimiz eng qiyin künlerdimu bir-birini qollighan. azadliq urushining eng qiyin mezgilliride, afghanistanning türkiye büyük millet mejlisi (parlaménti) ni étirap qilishi xelqimizge küch béghishlighan.

türkiye bolsa, kabulda elchixana achqan birinchi dölet bolghan. yash türkiye bir tereptin, öz tereqqiyatini dawamlashtursa, yene bir tereptin, afghanistanning küchlük dölet bolup, özige tayinip qed kötürüshige yardem qilghan» dédi.

u ikki döletning xelqaraliq munberlerde we köp tereplik méxanizmlarda yéqin hemkarliq munasiwiti ornatqanliqini eskertip, türkiye bilen afghanistanning térrorluqqa qarshi küreshtimu birlikte heriket qilghanliqini éytti.

u türkiyening afghanistanning tereqqiy qilishini we muqimliqini qollishining dawamlishiwatqanliqini eskertip: «afghanistangha qaratqan tereqqiyat yardemlirimiz, dölitimiz emeliyleshtürgen eng chong yardem pirogrammilirining muhimliridin biri hésablinidu. telim-terbiye, sehiye, ul-eslihe qatarliq oxshimighan sahelerde texminen 1300 layiheni emelge ashurduq. afghanistanda 100 din artuq mektepke qilghan yardemlirimiz we 4 mingdin artuq afghanistanliq oqughuchigha bergen oqush mukapatlirimiz bilen, afghanistanning kélechikige hesse qoshuwatimiz» dédi.

u türkiyening waba mezgilidimu afghanistanni yalghuz tashlap qoymighanliqini eskertip: «afghanistan xewpsizlik küchlirini telim-terbiye we qorallandurush jehette qilghan yardemlirimiz bilen, nato qismi ichide wezipe ötewatqan eskerlirimiz arqiliq qérindashlirimizning bixeterlikige hesse qoshushni dawamlashturuwatimiz. afghanistanliq qérindashlirimiz xalighan muddetkiche u dölette turushni dawamlashturimiz» dédi.

u afghanistanliqlar ara muzakirelernimu tinchliq üchün purset ikenlikini we türkiyening bu tirishchanliqlar üchün hesse qoshushni dawamlashturidighanliqini bildürdi.



مۇناسىۋەتلىك خەۋەرلەر