erdoghan: «kowid – 19» yuqumi hemkarliqning muhimliqini ispatlap berdi

türkiye awazi radiyosi xewiri: jumhur reis rejep tayyip erdoghan, muawin jumhur reis fuat oktay we ezerbeyjan bash ministiri eli esedowning ishtirak qilishida chaqirilghan «türk dunyasi météorologiye munbiri» yighinida qilghan sözide, «kowid – 19» yuqumi basquchining, türk dunyasining birlik we barawerliki hem hemkarliqining muhimliqini ispatlap bergenlikini tekitlep mundaq dédi: «türk dunyasi bolush süpitimiz bilen biz arqida qaldurghan mezgilde, ‹kowid – 19› yuqumi sewebidin köpligen dostlirimiz, yéqin – yoruqlirimizdin ayrilip qélishtek musibetke duch kelduq. shuning bilen bir waqitta, 30 yilliq ishghaldin kéyin, taghliq qarabaghning tekrar ana weten bilen quchaqlishishining bextiyarliqighimu chömduq.»

ezerbeyjanliqlarni uda 44 kün dawamlashqan dastan xaraktérlik küreshliri arqiliq mislisiz zeperni qolgha keltürgenlikliri munasiwiti bilen tebrikligen erdoghan, mundaq dep körsetti: «hem taghliq qarabagh urushi, hemde ‹kowid – 19› yuqumi basquchida bashtin kechürgenlirimiz, dölet mudapiesidin diplomatiyegiche, sehiyedin yéza igilikkiche, sayahettin énérgiyegiche her sahede türk dunyasining birlik we barawerliki hem hemkarliqining muhimliqini ispatlap berdi.

oxshash tilda sözlishidighan, oxshash dingha étiqad qilidighan, tarixi bir, medeniyiti bir, kültüri bir, 300 milyon türk dunyasining eslide nahayiti chong bir aile ikenlikini bu munasiwet bilen tonup yettuq. aile ezaliri bolush süpitimiz bilen, aldimizdiki mezgilde asasliq mesuliyitimiz, özara rishtilirimizni kücheytish, özara hemkarliqni yenimu yüksek sewiyege yetküzüsh bolushi kérek.  <türk dunyasi météorologiye birliki> qurush pikrini bu heqte tashlanghan qimmetlik bir qedem  dep qaraymen.»