erdoghan holokostni xatirilesh munasiwiti bilen sin körünüshlük uchur tarqatti

türkiye awazi radiyosi xewiri: erdoghan jumhur reislik mehkimisi uchur – alaqe ishliri idarisining xelqara chong qirghinchiliq (holokost — yehudiy qirghinchiliqi)ni xatirilesh küni munasiwiti bilen achqan tor békiti weremember.gov.tr ​​da sinliq uchur élan qildi.

insaniyet müshkül bir dewrni bashtin kechürüwatqanliqini, kowid – 19 yuqumi bilen birlikte irqchiliq wirusiningmu künséri kéngiyiwatqanliqini körüp yetkenliklirini tilgha alghan erdoghan: «jame, ibadetxana we chérkawgha oxshash ibadet orunlirigha qilinghan zorawanliq heriketliride nahayiti éghir derijide köpiyish boluwatidu. milliy kimliki, diniy, tili, tashqi körünüshi perqliq qatlamlargha öchmenlik qilish jinayiti barghanséri ewj éliwatidu. irqchiliq térrori jemiyetning tinchliqi we kishilerning birlikte yashash iradisige zerbe uridighan bixeterlik tehditige aylandi. halbuki, ötken esirde meydangha kelgen azabliq weqeler irqchiliq idiologiyisining qandaq azablarni keltürüp chiqiridighanliqini körsitip bergenidi» dégenlerni qeyt qildi.

milyonlarche insan jénidin ayrilghan chong qirghinchiliqning, bosniye- gértségowina, riwanda we kambodzha qirghinchiliqlirining her birining xelqara jemiyetke mesuliyitini  eslitidighan janliq misal ikenlikige isharet qilghan erdoghan, öchmenlikke qarshi küresh qilishning peqet ziyankeshlikke uchrighuchilarningla emes, pütkül insaniyetning ortaq burchi ikenlikini tekitlidi.

jumhur reis erdoghan,  chong qirghinchiliq, bosniye- gértségowina, riwanda, kambodzha tiragédiyelirining qayta yüz bermesliki üchün xelqara jemiyetning heriketke ötüshi kéreklikige isharet qilip: «xususen reqemlik supilar we neshriyat – axbarat orunlirining tesiride ewj élip ketken islam düshmenliki we chet elliklerni yaman körüsh xahishlirigha <toxta> déyilishi kérek» dégenlerni sözlirige ilawe qildi.