әрдоған: йуқум иш дунйасиниң алдида йеңи пурсәт пәнҗирилириниму ачти

түркийә авази радийоси хәвири: җумһур рәис әрдоған, түркийә йаш карханичилар конфедератсийәси иҗраийә һәйити әзалирини қобул қилғанда, 2020 – йилиниң, «ковид – 19» йуқуми сәвәбидин пүткүл дунйа билән бирликтә түркийәдиму қийин шараитта өткәнликини әскәртти, йуқум мәзгилидә, күчлүк сәһийә қурулмисидин сирт йәнә, тәтқиқ қилиш – тәрәққий қилдуруш, експортниң сода ишлирида базар вә мәһсулат сәрхиллиқиниң муһимлиқиниңму очуқ – ашкара һалда көрүлгәнликини қәйт қилди, түрк ширкәтлириниң әла сүпәтлик мәһсулатлири, риқабәтчи баһалири вә ишәнчилик болуши түпәйли, «ковид – 19» йуқуми мәзгилидә рәқиблиригә қариғанда алаһидә үстүнлүкни игилигәнликини тәкитләп мундақ деди: «експортта алдинқи йилни 169.5 милйард доллар билән оттура мәзгиллик пирограмма нишанини 5 милйардтин йуқири сәвийәгә йәткүзүшкә мувәппәқ болдуқ, дөлитимизниң йәр шари характерлик експорттики үлүши, өткән йилниң йанвар – өктәбир айлириға аит санлиқ мәлуматлири етибари билән, тунҗи қетим % 1 тин ешип, % 1.03 сәвийәсигә йәтти. експортчилиримизниң сани 87 миң 400 ашти, бултурқи тунҗи қетим експорт саһәсигә қәдәм қойған ширкәтлиримизниң сани 18 миң 123 кә йәтти.»

җумһур рәис әрдоған, 2020 – йили дөләттә қурулған ширкәт саниниң «ковид – 19» йуқумиға қаримай % 20 ешип, 101 миң 318 гә йәткәнликини әскәртиш билән бир вақитта, мәбләғ селиш үчүн техиму йахши муһит йаритип берәләйдиған, техиму йахши мөлчәрләш земини һазирлап берәләйдиған, мәбләғ салғучиларниң тәләплирини йәниму йүксәк сәвийәдә қандуралайдиған бир шараит йаритиш үчүн имканийәтниң баричә тегишлик қәдәмләрниң ташлинидиғанлиқиниму сөзлиригә илавә қилди.