türkiye b d t ning liwiye alahide wekilidin xursen ikenlikini bildürdi

türkiye awazi radiyosi xewiri: türkiye tashqi ishlar ministirliqi teripidin bu heqte élan qilinghan yazma bayanatta, silowakiyede ilgiri tashqi ishlar ministirliqi wezipisi ötigen yan kubisning, birleshken döletler teshkilatining liwanda turushluq bash maslashturghuchisi süpitide wezipe ötigenliki, köpligen rayonluq we xelqaraliq teshkilatlarda muhim hem musheqqetlik wezipilerni öz üstige alghanliqi tekitlinip mundaq déyildi: «kubisning tejribe – sawaqlirining türtkiside, liwiyede uzaq mezgillik tinchliq we muqimliq ornitilishi yolida milliy muresselishish tirishchanliqlirigha nahayiti zor töhpilerni qoshidighanliqigha ishinimiz. türkiye kubisning liwiyede kirizisni siyasiy yollar arqiliq hel qilish yolida körsitidighan tirishchanliqlirini qollaydu. kubisqa yéngi wezipiside muweppeqiyet tileymiz, bu wezipini yéqindin buyan öz üstige éliwatqan stéfané turko williyamisqimu, qoshqan töhpiliri munasiwiti bilen minnetdarliq bildürimiz.»

birleshken döletler teshkilati bash katipi antonyo gutérésh, ghssan selamening istépasidin kéyin, yéqindin buyan bosh turuwatqan wezipige 18 – yanwar küni kubisni teyinligenlikini uqturghanidi.

liwanliq sabiq wekil selame, 2017 – yili iyun éyida teyinlengen wezipisidin, 2020 – yili mart éyida «salametlikining yar bermesliki sewebidin» istépa bérishidin kéyin, birleshken döletler teshkilatining liwiye diplomatiyesini  ishqa ashuridighan shexs, texminen 10 aydin buyan békitilelmigenidi.