chawushoghlu türkiye - amérika munasiwetliri üstide toxtaldi

türkiye awazi radiyosi xewiri: ministir mewlüt chawushoghlu, dunya axbaratchilar kéngishining «yershari médiya zhurnili» bilen ötküzgen söhbiti jeryanida, türkiye bilen amérika qoshma ishtatlirining özara menpeet we ortaq qimmet qarashlarni asas qilghan chongqur, shundaqla sinaqlardin ötken ittipaqdashliq munasiwitige ige ikenlikige isharet qilip ötti.

chawushoghlu, eger amérika eneniwi biterep meydanida ching tursa, sherqiy aqdéngiz we rayongha alaqidar bashqa mesililerde ijabiy rol oyniyalaydighanliqini otturigha qoydi.

chawushoghlu, amérikaning fetullahchi térrorluq teshkilati (fetö) we y p g gha oxshash térrorluq teshkilatlirigha qarshi heriketke ötmesliki yaki ular bilen hemkarlishishning türkiyening dölet bixeterlikige biwasite tesir körsitidighanliqini bayan qilip, amérikaning yéngi rehberlik apparatini bu mesililerde derhal heriketke ötüshke chaqirdi.

chawushoghlu, «qandaqla bolmisun, biz söhbet we diplomatiye arqiliq ixtilaplirimizni yéngishimiz kérek dep qaraymiz. tehdit we jaza sözlirining bundaq muhim munasiwette orni yoq» dégenlerni qeyt qildi.

amérikaning türkiyege qarshi élan qilghan «amérikaning reqiblirige qarshi émbargo yürgüzüsh arqiliq küresh qilish qanuni» gha asasen jaza yürgüzüsh qararlirini eyibligen chawushoghlu, «wezipe ötesh mudditi axirlashqan amérika hökümiti (donald tramp)ning, ikki terep munasiwetlirimiz we rayondiki öz menpeetlirini qurban qilish bedilige dölet ichi siyasiy menpeetlerge bash égishi epsuslinarliq bir ehwal. elwette türkiye bu qarargha qarshi tégishlik qedemlerni tashlaydu hemde muwapiq dep qarighan shekilde we zamanda qayturma usul qollinidu. biz amérikaning bu éghir xataliqni tézdin tüzitishini kütimiz we uninggha righbetlendürimiz» dégenlerni sözlirige ilawe qildi.