türkiye israiliyening qoshumche olturaq rayoni pilanini testiqlishidin ensirewatqanliqini bildürdi

türkiye awazi radiyosi xewiri: türkiye jumhuriyiti tashqi ishlar ministirliqining, israiliyening qanunsiz olturaqlishish paaliyetlirini tézlitishi toghrisidiki yazma bayanatida: «biz israiliyening iyordan deryasining gherbiy qirghiqida 850 yürüsh öylük qoshumche qanunsiz olturaq rayoni qurush pilanini testiqlaydighanliqi toghrisidiki bayanlardin endishe qilmaqtimiz» dégen ibarilerge orun bérildi.

bayanatta, bu qedemning, israiliyening amérika qoshma ishtatliridiki yéngi rehberlik apparatining wezipe tapshurup élishidin burun süritini ashurghan qanunsiz qilmishlirining eng yéngi misalini teshkil qilidighanliqigha isharet qilinip: «israiliyening mezkur olturaq rayoni paaliyetliri arqiliq jughrapiyelik pütünlük we igilik hoquqluq pelestin döliti qurulushining aldini élish, shundaqla ikki döletlik hel qilish charisini yoqitishqa tirishiwatqanliqi éniq. biz xelqara jemiyetni birleshken döletler teshkilati (b d t) qararliri bashta bolup xelqara qanunni depsende qiliwatqan bu qilmishlargha xatime bérishi üchün israiliyege tégishlik bésimni ishlitishke we bu tajawuzchi heriketlerge qarshi chiqishqa chaqirimiz» déyildi.

israiliye dairilirining kéler hepte iyordan deryasining gherbiy qirghiqida yehudiy köchmenler üchün yene 850 öy sélish qararini testiqlaydighanliqi otturigha qoyulghanidi.