erdoghan yawropa döletlirining bash elchiliri bilen körüshti

türkiye awazi radiyosi xewiri: türkiye jumhur reisi rejep tayyip erdoghan ittipaq muzakiresini bahane qilip, türkiye-yawropa ittipaqi küntertipining süyiistémal qiliniwatqanliqini bildürdi.

u: «bu pozitsiye, bir tereptin, yiltizi chongqur munasiwetlirimizni esir éliwalsa, yene bir tereptin, yawropa ittipaqining rayonluq we dunyawi küch bolush meqsitini ajizlitidu. sherqiy aqdéngizni riqabet meydani bolushtin chiqirip, uzun muddetlik menpeetlirimizge xizmet qilidighan hemkarliq déngizigha aylandurushimiz kérek» dédi.

u enqerediki chanqaya sariyida yawropa ittipaqi döletlirining enqerede turushluq bash elchiliri bilen körüshti.

u: «girétsiyeni weziyetni keskinleshtürüwétidighan heriketlerdin waz kéchishke chaqirimiz» dédi.

u yawropa ittipaqining qibris türk terep bilen héchqandaq alaqe qilmighanliqi üstide alahide toxtaldi we sözini mundaq dawamlashturdi:

«bundaq bolghanda, yawropa ittipaqi qibris mesilisini asanlashturup hel qilishta héchqandaq rol oyniyalmasliqi mumkin. hemme kishi türkiye we shimaliy qibris türk jumhuriyiti bolmighan her qandaq üsteldin, aqdéngiz tinchliqining chiqmaydighanliqini chüshendi. qibrista muweppeqiyetsiz bolghan modéllarni qayta-qayta sözlishishning ornigha, yéngi we emeliyetchil usullarni muzakire qilishimiz kérek.»

u yawropadiki islam qorqunchi mesilisi üstidimu toxtaldi.

u: «islam öchmenliki, yawropa yashaydighan 6 milyongha yéqin kishining bixeterlikige tehdit salghandin bashqa, yawropa meniwi qimmetliri nuqtisidin éytqandimu chong kemchilikke aylinidu» dédi.

u türkiye-yawropa ittipaqi munasiwetliri üstide toxtilip, mundaq dédi:

«dölet bolush süpitimiz bilen, uzun yiraqqa qarash jehettin ijabiy küntertip oeyda qilish we munasiwetlirimizni qaytidin yoligha sélish üchün teyyarmiz. dölitimizning 60 yilgha toshqan ezaliq musapisi, biz üchün qandaq istratégiyelik tallash bolghan bolsa, yawropa ittipaqining dölitimizni toluq ezaliqqa qobul qilishimu, ittipaqning kélechiki nuqtisidin ontologiyelik tallash hésablinidu. engliyening ittipaqtin chékinishi bilen éship barghan éniqsizliq, peqet türkiyening yawropa ailiside layiq bolghan ornigha ige bolushi bilen yoqilishi mumkin.»

u türkiyening térrorluqqa qarshi küreshte, héchqandaq nato dölitini yalghuz tashlap qoymighanliqini xatirilitip: «undaqta, néme üchün nato döletliri bizni tashlap qoyidu?» dep soal tashlidi.

u axirida, wuxen wirusi(Kovid-19)  toghrisida toxtilip: «insan üstide sinaq qilish basquchidiki yerlik waksinalirimizni kéreklik testiqlardin ötküzgendin kéyin, xelqimiz we pütkül insaniyetning xizmitige sunimiz» dédi.