chawushoghlu: türkiye yéngi sehipe échishqa tirishmaqta

türkiye awazi radiyosi xewiri: chawushoghlu, tünügün ispaniye ziyariti dairiside ispaniye tashqi ishlar weziri arancha gonzaléz laya bilen körüshkendin kéyin ötküzülgen qoshma axbarat élan qilish yighinida, ispaniye bilen bolghan mewjut mixanizimlardin téximu ünümlük paydilinish we hökümetler ara 7 – nöwetlik bashliqlar yighinini bu yilning ikkinchi yérimida türkiyede chaqirish mesiliside ortaq tonush hasil qilghanliqlirini eskertish bilen bir waqitta, ikki terep munasiwetlirini her sahede yenimu yüksek sewiyege yetküzüsh üchün birlik we barawerlik asasida heriket qilish iradilirining qetiylikini tekitlep we  türkiyening yawropa ittipaqigha ezaliqi mesiliside enqereni qollap kéliwatqan ispaniyege minnetdarliq bildürüp, mundaq dédi: «2020 – yili, biz duch kelgen mesililer sewebidin yawropa ittipaqi bilen bolghan munasiwetlirimizde, ittipaqqa eza bir qisim döletler bilen sürkilishni bashtin kechürduq. emma bundaq qiyin sharaittimu ispaniyege oxshighan eqilge tayinip ish köridighan we eqilge tayinishni ilgiri süridighan bashqa döletlerning eqil-parasiti sayisida, sürkilishning ornigha diyalog yoli tallanmaqta. derweqe, uchrishishimiz buninggha zémin hazirlap berdi. nöwette yawropa ittipaqi bilen bolghan munasiwetlirimizde yéngi sehipilerni échiwatimiz.»

jumhur reis rejep tayyip erdoghanning yawropa ittipaqi kéngishi we yawropa ittipaqi komitétining bashliqlirini türkiyede ziyarette bolushqa teklip qilghanliqini éytqan chawushoghlu, öziningmu 21 – yanwar küni bélgiyening paytexti biryussélda, yawropa ittipaqi tashqi munasiwetler we bixeterlik ishliri siyasiti aliy wekili josép borél bilen bir yerge jem bolidighanliqini tekitlidi.

ispaniye tashqi ishlar weziri laya mundaq dédi: «türkiye bizge nisbeten adettiki bir qoshna dölet emes, eksiche, yawropa ittipaqi bilen alahide munasiwetlerge ige, chet el bazarlirida erkin – azade heriket qilalaydighan, yawropa ittipaqi bilen toluq ezaliq namzatliqi dawamlishiwatqan, jughrapiyelik orni özgiche ewzellikige ige muhim bir dölettur.»

bu yil yawropa ittipaqi – türkiye munasiwetliride ijabiy küntertipke merkezlishishning muhimliqi toghruluq chaqiriqta bolghan laya, ijabiy küntertipni, mewjut yönilishler dairiside diyalog asasida söhbet ötküzüsh, ighwagerchilik we jiddiylikni tügitish, konkrét qararlarni chiqirish arqiliq bu qedemlerni muweppeqiyet musapisige aylandurush, teriqiside chüshendürdi.

u yene, türkiyening hem liwiye, süriye we taghliq qarabagh qatarliq rayonluq mesililerning hel qilinishida, hemde ottura sherq rayonidiki tinchliq musapiside muhim aktiyor ikenlikinimu sözlirige ilawe qildi.