shentop, qalin, altun we bozqir amérikadiki özgirishler heqqide bayanat élan qildi
türkiye parlaménti bashliqi mustafa shentop,ibrahim qalin, fahrettin altun, we birleshken döletler teshkilati 75 – nöwetlik omumiy kéngishining bashliqi wolqan bozqir amérika qoshma ishtatliridiki özgirishler heqqide bayanat élan qildi.
türkiye awazi radiyosi xewiri: türkiye büyük millet mejlisi bashliqi mustafa shentop, ammiwi ortaqlishish tor bétidiki sehipiside, amérika qoshma ishtatlirida pirézidént saylimidin kéyin otturigha chiqqan we tünügün namayishchilarning dölet mejlisi binasigha bésip kirishke teshebbus qilish derijisige bérip yetken özgirishlerni endishe ichide közitiwatqanliqlirini eskertish bilen bir waqitta, barliq tereplerni soghuqqanliq bilen heriket qilishqa chaqirip mundaq dédi: «amérika qoshma ishtatliridiki özgirishlerni qattiq endishe ichide közitiwatimiz, barliq tereplerni soghuqqanliq bilen heriket qilishqa chaqirimiz, saqliniwatqan mesililerning hemishe qanun we démokratiye asasida hel qilinidighanliqigha ishimiz, türkiye bolush süpitimiz bilen, herdaim qanun we démokratiye terepdari bolup kelduq, hemmigimu buni tewsiye qilimiz.»
jumhur reislik sariyi bayanatchisi ibrahim qalin, ammiwi ortaqlishish tor béti Twitter sehipiside, amérika qoshma ishtatlirining paytexti washingtonda pirézidént trampni qollap namayish ötküzgen bir guruppining saqchilarning tosuqliridin halqip ötüp, dölet mejlisi binasigha kirishke teshebbus qilishi heqqide, hem inglizche hem türkche élan qilghan bayanatida, mundaq dédi: «amérika qoshma ishtatlirida yüz bériwatqan özgirishlerni endishe ichide közitiwatimiz.»
jumhur reislik sariyi uchur – alaqe ishliri idarisining bashliqi fahrettin altun, ammiwi ortaqlishish tor bétidiki sehipiside, élan qilghan bayanatida, mundaq dédi: «amérika qoshma ishtatlirida démokratiyening barliq dölet organliri we qanun – belgilimiliri bilen birlikte küchke ige qilinidighanliqigha ishinimiz.»
birleshken döletler teshkilati 75 – nöwetlik omumiy kéngishining bashliqi wolqan bozqir, ammiwi ortaqlishish tor béti Twitter sehipiside, élan qilghan bayanatida, pirézidént donald trampning qollighuchilirining tünügün amérika dölet mejlisige bésip kirishke teshebbus qilishidin kéyin otturigha chiqqan özgirishlerni qattiq epsuslinish we endishe ichide közitiwatqanliqini tekitlep mundaq dédi: «amérika qoshma ishtatliri dunya boyiche eng chong démokratik döletlerdin biri. bundaq halqiliq bir peytte, sahibxan dölitimizde démokratik basquchlarda tinchliq we hörmetning üstünlükni igileydighanliqigha ishinimen.»
