әрдоған җалалидин руми вапатиниң 747 йиллиқи мунасивити билән телеграмма тарқатти

түркийә авази радийоси хәвири: әрдоған түрк- ислам мутәпәккури вә сопи мәвланә җалалидин руми вапатиниң 747 йиллиқи мунасивити билән телеграмма тарқатти.

җумһур рәис әрдоған телеграммисида төвәндикиләрни тилға алди, «вапат болғанлиқиниң 747 йиллиқида анадолуниң мәниви бинакарлиридин улуғ мутәсәввуп, мутәпәккур вә ислам алими мәвланә җалалиддин румини сеғиниш ичидә әсләймән.

рәббимниң бизни, хәлқимизни вә пүткүл инсанийәтни һәзрити мәвланәниң гуваһлиқиға несип қилишини үмид қилимән.

гәрчә униң вапат болғиниға йәттә йерим әсир болған болсиму, әмма һәзрити мәвланәни «һәмишә йеңи пети» тутуп турған сир ишиқ вә сөйгүдур.

һәзрити мәвланә «аллаһқа йетишниң нурғун йоллирини қойуп у муһәббәтни таллиди», у бу сөзини сөйгү билән сөзлиди вә бу йәрләрни муһәббәт соғурди.

мәвланәниң қәлб сүзгүчлиридин өткән нәсиһәтлири, питнә – пасат, бузуқчилиқ вә һәсәтхорлуқни йоқитип, дәвр вә чегралардин һалқиған қериндашлиқ муһитиниң бәрпа қилинишиға васитә болди.

дәрвәқә, йезилип йәттә йерим әсир өткәндин кейинму, нурғун тил, дин вә мәдәнийәткә тәвә милйонлиған кишиләр униң әқил-парасәт дәрйасидин бәһримән болмақта, хатирҗәмлик вә сукунатни мәснәви шәрифниң тәңдашсиз чоңқурлуқлиридин издимәктә.

биз бир пүтүн милләт сүпитидә билән, әсирләрдин һалқип кәлгән мушундақ мол мәниви хәзинигә игә болғанлиқимиз үчүн аллаһқа һәмду ейтимиз.

йәнә бир җәһәттин, дунйадики намратлиқ, бәхтсизлик, наданлиқ вә зиддийәтләргә нәзәр салидиған болсақ, заманимиз кишилириниң руминиң тинчлиқ вә муһәббәт учуриға қанчилик моһтаҗ икәнликини көрәләймиз.

инсанларни, дунйани қутуплишишқа иттириватқан кор идеологийәләр, һәммимизни хәтәрлик нуқтиға сөрәп кирмәктә.

ғәрб җәмийәтлиридә мәдәнийәт ирқчилиқи, чәт әлликләргә өчмәнлик қилиш вә ислам дүшмәнлики күндин- күнгә зәһәрлик нотиға охшаш йейилмақта.

пикир әркинлики тони астида муқәддәс җай вә затлиримизға һуҗум қилинмақта. етиқади, тили вә кийиниши сәвәбидин инсанлар дүшмәнләштүрүлмәктә.

түркийә болуш сүпитимиз билән, бу қорқунчлуқ картиниға қарши һәзрити мәвланәниң адимийлик, сөйгү, тинчлиқ, кәң қорсақлиқни мәркәз қилған мубарәк тәвсийәлириниң байрақдарлиқини қилмақтимиз.

биз һәзрити мәвланәдин алған илһамға тайинип, тили, ирқи вә дининиң қандақ болушидин қәтийнәзәр барлиқ кишиләргә йардәм қолини сунмақтимиз, районимизда тинчлиқ вә адаләтниң һөкүмран болуши үчүн тиришчанлиқ көрсәтмәктимиз.

өлтүрүш, қәтл қилиш вә ханивәйран қилиштин башқа һечнемини билмәйдиған йеңи дәврниң қарақчилириға қаримай, биз мәвланә туташтурған муһәббәт, достлуқ вә әқил- парасәт мәшилини көтүрүшни давамлаштуримиз.

пәрвәрдигаримдин бизләрни мәвланәниң илим вә ишқи – муһәббәт йолидин айримаслиқини тиләймән.

вапатиниң 747 – йилида һәрзити мәвланә башта болуп барлиқ көңүл султанлиримизни сеғиниш ичидә әсләймән, бу кечә қилинидиған дуа, селинидиған сама вә әвради шәрифләрниң аллаһниң дәргаһида қобул болушини тиләймән.»