әрдоған җалалидин руми вапатиниң 746 йиллиқи мунасивити билән телеграмма тарқатти

түркийә авази радийоси хәвири: әрдоған мәвлана җалалидин руми вапатиниң 746 йиллиқини хатириләш мунасивити билән тарқатқан телеграммисида, бүйүк мутәпәккур, сопи мәвлана җалалидин румини сеғиниш вә һөрмәт ичидә әсләп, анадолу земинлирида дунйаға кәлгән, һекмәт вә илимлири пүткүл дунйаға тарқалған, дунйа мәвҗутла болидикән, һәқ вә һәқиқәт йолучилириға рәһбәрлик қилидиған мәвлананиң, 746 йил өтүп кәткән болушиға қаримай, һәқиқәт ишқи вә инсан сөйгүсидики сәмимийити, пикирлири вә әсәрлири билән милйонларчә инсанни өзигә әгәштүрүп кәлгәнликини қәйт қилди.

мәвлана җалалидин руминиң хорасандин бағдадқичә, мәккә – мәдинәдин шамғичә болған зийарәт қилған барлиқ илим – ерпан мәркәзлиридин игилигән бирикмисини анадолуға елип кәлгәнликини хатирилитип өткән әрдоған, униң һәрбири һекмәт булиқи орнидики сөзлири арқилиқ пүткүл инсанийәтни әсирләр бойичә нур билән тәминләйдиған бир мәшәлни йаққанлиқини тәкитләп өтти вә сөзини давамлаштуруп, «бүгүн ахирқи вә әбәдий вәтинимиз сүпитидә мустәһкәм тутуп туруватқан бу земинға, дилларни пәтһи қилип мөһиримизниң бесилишида, мәвлананиң вә униң билән охшаш булақтин узуқ алған йунус әмрә, һаҗи байрами вәли, һаҗи бәкташ вәлигә охшаш көңүл султанлириниң бүйүк меһнити, төһписи, изи бардур» деди.

әрдоған, «бизни муһәббәт билән бир – биримизгә бағлиған бу бүйүк мирастин алған күчимиз арқилиқ алдимизға чиққан барлиқ қийинчилиқ вә тосуқларни һалқип, көңүл султанлиримизниң аманити болған сәвр вә күрәш ирадиси билән, бүгүнимиздин парлақ, хатирҗәм вә тинчлиққа толған әтиләргә, иншааллаһ, һәммимиз бирликтә йетимиз» дегәнләрни сөзлиригә илавә қилди.