әрдоған: һәрбий һәрикәттин ваз кәчмәймиз

түркийә авази радийоси хәвири: әрдоған түркийә бүйүк милләт мәҗлиси башлиқи мустафа шәнтопниң саһибханилиқида истанбулдики долмабаһчә сарийида  өткүзүлгән 3 – нөвәтлик «терроризмға қарши  күрәш вә районлуқ дөләтләр ара мунасивәтләрни күчәйтиш» темилиқ парламент башлиқлири йиғинида қилған сөзидә, түркийәниң уда 35 йилдин буйан терроризм вабасиға қарши изчил  күрәш қилип келиватқанлиқини тәкитләп мундақ деди: «нөвәттә биз охшимиған исимлар билән паалийәт елип бериватқан болсиму, лекин һиммисиниң нишани дөлитимизниң бирлик вә баравәрликигә, һузури һәм параванлиқиға зийан йәткүзүш болған террорлуқ тәшкилатлириниң һуҗумиға дуч келиватимиз. түркийә билән йүзтуранә һесаблишишқа җүрәт қилалмайватқан күчләр бу террорлуқ тәшкилатлирини қоллап кәлмәкәтә. чегра районлиримизниң сиртида тәрбийәләнгән бу террорчилар пурсәт тапсила пуқралиримизниң һузуриға, дөлитимизниң пүтүнлүкигә тәһдит селиватқан қанлиқ һәрикәтләрни елип бармақта. шуңа террорчиларниң дәрвазимиз алдиға келишини күтүшниң орниға өз җайда бир тәрәп қиливетишини қарарлаштурдуқ. бу мәқсәттә, чегра районлиримизниң сиртида ува йасивалған бу террорлуқ тәшкилатлирини өз увисида уҗуқтуруветиш истиратегийәсини түзүп чиқтуқ. түркийә қошна әлләрниң вә башқа дөләтләрниң игилик һоқуқи вә земин пүтүнлүкигә һәмишә һөрмәт қилиду؛ әмма буниң алдинқи шәрти бу әлләр тәрипидин дөлитимизниң һуҗумға учримаслиқи, дүшмәнләрчә паалийәтләрниң елип берилмаслиқидур. бизниң бу күришимиз кордларни әмәс, әксичә террорлуқ тәшкилатлирини нишан қилиду. кордлар бизниң қериндашлиримиздур. мәйли п й д болсун, мәйли й п г болсун, мәйли даеш болсун һәммиси террорлуқ тәшкилатидур. бу һәқтә қолимизда йетәрлик дәриҗидә дәлил – испатлар һәм һөҗҗәтләр бардур.»

террорчиларниң топқа тутуши нәтиҗисидә бир йашлиқ сүрийәлик бир бовақниң өлүп кәткәнликини әскәрткән әрдоған, мундақ дәп көрсәтти: «буниңдин башқа йәнә, террорчиларниң һуҗумлирида бизниң хәлқимиздинму 10 ға йеқин киши һайатидин айрилди. буниңдин илгири йүзләрчә киши өлтүрүлди. әһвал әнә шундақ турса, биз қачанғичә күтимиз? хәлқимизниң өлүп кетишини күтүп туралмаймиз. түркийә болуш сүпитимиз билән, 911 километирлиқ чегра линийәмиздики, сүрийә һөкүмитиму қобул қилмайватқан п й д, й п г гә қарши ташлиған бу қәдимиздин әсла ваз кәчмәймиз. <бу  һәрикитиңизни тохтитиң> дәп уйақ – буйақтин бизгә тәһдитләр келиватиду. америка қошма иштатлири пирезиденти доналд трампқиму, башқа рәһбәрләргиму <әгәр силәр бизниң бу һәрикитимизни тохтиталисаңлар тохтитиңлар» дедуқ. әмма улар бизни тохтиталиғини йоқ. җүмлидин биз өзимизниң мәсилисини өзимиз һәл қилимиз, шуңа бу мәқсәттә атланған сәпиримиздин ахирқи ғәлибини қолға кәлтүрмигүчә әсла қайтмаймиз.»