йилдирим: интернет тор җинайәтлиригә қарши хәлқаралиқ әһдинамиләр болуши керәк

түркийә авази радийоси хәвири: баш министир бинали йилдирим анталйа сәрик наһийәси бәләк сайаһәтчилик мәркизидә ечилған хәлқара интернет тор содиси конферансида сөз қилди. у дунйа миқйасида учур-алақә ишлирида йеңилиқ йаритиш үчүн, б д т әһдинамилиригә охшаш бир қатар келишимләрни түзүп чиқиш керәкликини билдүрди. у: «йавропа кеңиши парламентиниң мушундақ келишими бар, бирақ йетәрлик әмәс. интернет тор җинайәтлиригә қарши күрәш қилиш үчүн техиму кәң даирәлик келишимләргә еһтийаҗимиз бар. ундақ болмиғанда, дөләтләр оттурисидики тоқунушлар вә ихтилапларниң техиму көпийип кетиш еһтимали бар» деди.

у интернет тор дунйасида өткүзүлгән җинайәтләрниң реал дунйада өткүзүлгән җинайәттин нәччә һәссә еғир икәнликини билдүрди. у интернет торида өткүзүлгән җинайәтни байқашниң наһайити қийинлиқини, хәлқара сәһниләрдики қануний сәвәбләр түпәйлидин кәлтүрүп чиқарған зийинини толдурушниң мумкин әмәсликини қәйт қилди.

баш министир бинали йилдирим сөзидә, интернет тор бихәтәрликиниң барғансери муһим болуватқанлиқини тәкитлиди вә мундақ деди:

«бу саһәдә илгириләш қолға кәлтүрәлмигән дөләтләр үчүн ейтқанда, интернет нимәт болуштин, тәһдит, җаза вә азапқа өзгириду. шуңа, учур җәмийити болуш нишанимизни әмәлгә ашурған вақтимизда бу нуқтини чоңқур ойлишишимиз керәк.»

у сәһийәдин содиғичә, дөләт мудапиәсидин маарипқичә, пул-муамилидин барлиқ саһәләргә мунасивәтлик болған учурларниң електирон дунйасида алмаштурулидиғанлиқини қәйт қилди.

йеқинқи 15 йилда түркийәдики асасий әслиһә селинмилири сайисидә, өзара алақидә саһәләр бойичә муһим тәрәққийатларниң қолға кәлтүрүлгәнликини ейтқан бинали йилдирим, бүгүнки күндә түркийәдә сиғимчанлиқи йуқири болған интернет торлишиш нисбитиниң %60 ниң үстидә икәнликини билдүрди.

у интернеттә барғансери көп ишларниң қилинидиғанлиқини, әқиллиқ телефонларда қилиниватқан тор содилириниң кишиниң бешини қайдуридиған тезликтә тәрәққий қилғанлиқини билдүрүп: «йеқинқи төт йилда интернет тор содиси дунйа сода нисбитидә төт һәссә ашти. йиллиқи %100 лик ешиш билән меңиватиду. бүгүн дөлитимиздә әқиллиқ телефон ишлитидиғанларниң сани 70 милйондин ешип кәтти. бу рәқәмгә қариған вақтимизда, интернет тор содиси саһәсиниң дөлитимиз үчүн муһим саһә икәнликини ейталаймиз» деди.

у тор содисиниң омумлишиватқанлиқини, дунйа иқтисади %3 дин төвән ешиватқан болсиму, әмма интернет тор содисидики тәрәққийатниң нәччә һәссә қатлинип ешиватқанлиқини алаһидә тәкитлиди. у: «алдимиздики йилларда тор содиси билән шуғуллинидиғанларни тонитидиған, абруйини өстүридиған, дөләт ичи вә сиртида риқабәт күчини ашуридиған йеңи сийасәтләрни йолға қойимиз, тор содисида нишанимиз, җумһурийитимизниң 100-йили болған 2023-йилида 350 милйард лираға йәткүзүштур, бу нишанимизға мувәппәқийәтлик һалда йетимиз» деди.

у түркийәниң сетивелиш күчи җәһәттә дунйада 13-орунда туридиғанлиқини, дунйада алдинқи орунда туридиған 10 чоң лайиһәниң алтисини түркийәниң әмәлгә ашурғанлиқини билдүрди.