04.07.2022
bügünki türkiye gézitliride asasiy salmaqni igiligen xewerlirimiz töwendikiche:
türkiye awazi radiyosi: «‹star› géziti», «girétsiye metbuatliridin kishini heyran qalduridighan iqrar» serlewhilik xewiride, töwendiki uchurlarni oqurmenlirining diqqitige sundi:
girétsiyede chiqidighan «‹Ta Nea› géziti» ning «erdoghanning söhbet seniti» témiliq maqaliside, türkiye jumhuriyiti jumhur reisi rejep tayyip erdoghanning shimaliy atlantik ehdi teshkilati bashliqlar yighinidiki roli alahide tekitlnip, mundaq déyildi: «türkiye jumhuriyiti jumhur reisi rejep tayyip erdoghan, xelqara sehnide özining yenila özgiche söhbetlishish senitining barliqini namayen qildi. biz bezide erdoghanning xelqara sehnidiki meqsitige yétish üchün alahide tejribe we iqtidargha ige siyasetchi ikenlikini untup qalimiz.»
«‹höriyet› géziti», «‹penje – qulup› herbiy herikiti bölgünchi térrorluq teshkilatini alaqzade qiliwetti» serlewhilik xewiride, munu uchurlarni oqurmenlirining diqqitige sundi:
iraqning shimalida 17 – aprél küni bashlanghan we muweppeqiyetlik halda dawamlishiwatqan «penje – qulup» herbiy herikiti arqiliq rayon térrorchilardin tazilanmaqta. dölet xewpsizlik menbelirining bildürüshiche, muweppeqiyetlik hem ghelibilik halda dawamlishiwatqan «penje – qulup» herbiy herikiti sewebidin, bölgünchi térrorluq teshkilati p k k ning atalmish yuqiri derijilik kattibashliri, bashqa térrorchilarni ölümge terk étip, qachmaqta iken.
«‹xewer türk› géziti», «türkiyediki tok qachilash ponkitlirigha zor meblegh sélish» serlewhilik xewiride, töwendiki uchurlarni oqurmenlirining diqqitige sundi:
sanaet we téxnologiye ishliri ministirliqi, türkiyede tok aptomobillirigha tok qachilash ul eslihelirini qurush meqsitide ishqa kirishtürgen «tok aptomobillirigha téz tok qachilash ponkitliri qollash pirogrammisi» arqiliq 1 milyard lira meblegh sélindi. qollash pirogrammisi arqiliq türkiye téz tok qachilash iqtidarini eng téz ashurghan döletlerning birige aylinidu.
«‹yéngi shepeq› géziti», «téknofést (téxnologiye féstiwali) karxanichilar pirogrammisi tünügün istanbulda ishqa ashurulghan tonushturush paaliyiti arqiliq bashlandi» serlewhilik xewiride, T3 fondi jemiyitining ijraiye heyiti reisi selchuq bayraqtarning munu sözlirini neqil keltürdi: «karxanichilar pirogrammisi arqiliq hel qilghuch musabiqige qatnishish hoquqigha érishken wa aldinqi qatardin orun alghan yash qérindashlirimiz, dölitimizning milliy téxnologiye herikiti dairisidiki toluq musteqil kelgüsi üchün xizmet qilish musapisini dawamlashturidu.»
«‹sabah› géziti», «türkiye höddigerlirining zor muweppeqiyiti» serlewhilik xewiride, munu uchurlarni oqurmenlirining diqqitige sundi:
omumiy tijaret sommisini kündin-künge ashuruwatqan türkiyening chet eldiki höddigerlik sahesining, bu yilning deslepki yérimida öz üstige alghan 132 layihening qimmiti 4 milyard 600 milyon dollargha yetti. türkiyening chet eldiki höddigerlik sahesidiki 40 shirket, xitay we amérika qoshma ishtatliridin qalsila üchinchi orunda turidu.
