01.07.2022

türkiye awazi radiyosi: «yéngi shepeq» géziti, jumhur reis rejep tayyip erdoghanning tünügün ispaniyening paytexti madridta ötküzülgen shimaliy atlantik ehdi teshkilati — nato bashliqlar uchrishishidin kéyin ötküzülgen muxbirlarni kütüwélish yighinida söz qilip, «shiwétsiye, türkiye, finlandiye qatarliq üch terep ramka kélishimi, türkiye we xelqimizge nisbeten musheqqetlik söhbet musapisidin kéyin qolgha keltürülgen diplomatik ghelibidur» dégenlikini oqurmenliri bilen ortaqlashti.

«hürriyet» géziti, amérika qoshma ishtatliri pirézidénti jo baydinning nato bashliqlar uchrishishidin kéyin bir yighinda, «türkiyege F-16 tipliq ayropilan sétip bérishimiz kérek. buning eksiche yol tutush bizge paydiliq emes. bu dölet mejilisining testiqidin ötüshi kérek, biz buni emelge ashuralaymiz» dégenlikini yazdi.

«sabah» géziti, ispaniye bash ministiri pédro sanchézning, madridta ötküzülgen nato bashliqlar yighinidiki «ijabiy pozitsiyesi» üchün türkiyege minnetdarliq bildürüp, «türkiye bixeterlik we muressechiliktiki muhim shérik. bügün jumhur reis erdoghan bilen körüshtüm. men uning rusiyening ukrainagha qaratqan tajawuzchiliqigha xatime bérip, diyalogni ilgiri sürüsh yolida körsetken diplomatik tirishchanliqi we natoning jenub qanitini kücheytishni qollighanliqigha rehmet éyttim» dégenlikini yazdi.

«xabertürk» géziti, türkiyening éksporti may éyida bulturqining oxshash mezgilige sélishturghanda %15.3 éship, 18 milyard 984 milyon dollargha yetkenlikini, 1 milyard 492 milyon dollarliq mehsulat éksport qilinghan gérmaniyening may éyi éksportida birinchi qatardin orun alghanliqini yazdi.

«star» géziti, aljiriyede ötküzülgen 19- nöwetlik aqdéngiz tenheriket musabiqisining 5-künide (türkiye) döletlik judo mahiri wedat albayraqning 81 kiloluqlar hel qilghuch musabiqiside italiyelik reqibi kénniy komi bédélni yéngip altun médalgha érishkenliki toghrisidiki uchurlarni oqurmenlirining diqqitige sundi.