20.12.2021
bügünki türkiye metbuatliridin tallap teyyarlanghan muhim xewerlirimizning qisqiche mezmunliri töwendikiche:
türkiye awazi radiyosi: «xeber türk géziti», türkiye jumhur reisi rejep tayyip erdoghanning türkiyening dunyawi kirizislargha qarshi berdashliq bérish küchi we kirizislarni pursetke aylandurush mesiliside özige bolghan ishenchining astida, küchlük astiqurulma barliqini éytqanliqini xewer qildi.
xewerde, rejep tayyip erdoghanning iqtisadiy éshish reqemliri, ishqa orunlishish, éksport we xamchot tengpungluqliri qatarliq barliq körsetküchlerning, türkiye nuqtisidin éytqanda, dunya miqyasida muweppeqiyettin bésharet béridighanliqini éytqanliqi eskertildi.
«yéngi shepeq géziti», türkiye süniy hemrah filotining eng küchlük ezasi bolidighan «türksat süniy hemrahi» ning, amérika florida ishtatidiki «kéyip kanéwéral bazisi» (Cape Canaveral) din qoyup bérilgenlikini xewer qildi.
xewerde, bu qétim qoyup bérilgen süniy hemrah bilen, türkiyening orbitadiki jemiy xewerlishish süniy hemrahi sanining sekkizge chiqqanliqi we buning bilen, türkiyening melumat yetküzüsh süriti hemde iqtidarining 15 hesse ashidighanliqi bildürüldi.
«star géziti», amérika dölet mudapie ministirliqining meslihetchiliridin skot krino (Scott Crino) türkiye uchquchisiz hawa apparati «TB2-bayraktar» heqqide bayanat élan qilip: «süriye, liwiye we qarabaghdiki muweppeqiyetlerning astida türkiyening ishlepchiqrish mutexessisliki bar. türkiyening tejribe-sawaqliri, bashqa döletler yéqindin közitishi kérek bolghan mukemmel menzire» dégenliki qeyt qilindi.
«sabah géziti», türkiye waksina inistituti bashliqi we wuxen wirusi bilim kéngishining ezasi piroféssor doktor atesh karaning, yerlik wuxen wirusi waksinasi sinaqlirida deslepki melumatlarning intayin musbet ikenlikini éytqanliqini xewer qildi.
xewerde, türkowak waksinasi emletken kishilerde wuxen wirusi bilen yuqumlinip éghir késel bolghanlarning yoqluqi, waksinaning ularda antétila sewiyesini téz yuqirilatqanliqi we üchinchi waksina süpiitide xatirjem emletkili bolidighanliqi eskertildi.
«hörriyet géziti», wakif bankasi ayallar komandisining, dunya ayallar waliybol kulublar chémpiyonluqida, italiyening imoko konégliyano (Imoco Conegliano) komandisi üstidin 2 ge qarshi 3 netije bilen ghelbe qilip, tötinchi qétim chémpiyon bolghanliqini xewer qildi.
